ប្រព័ន្ធផ្សព្វផ្សាយអ៊ុយក្រែន បានដកស្រង់សម្តីរដ្ឋមន្ត្រីការបរទេសរបស់អ៊ុយក្រែន ដែលបាននិយាយនៅថ្ងៃពុធនេះថា មន្ត្រីជាន់ខ្ពស់មួយរូប បានចាប់ផ្តើមដំណើរទស្សនកិច្ចទៅកាន់សហរដ្ឋអាមេរិក ដើម្បីបង្កើតទំនាក់ទំនងជាមួយរដ្ឋបាលនាពេលខាងមុខរបស់ប្រធានាធិបតីជាប់ឆ្នោត លោក Donald Trump ដែលបានសន្យាថា នឹងបញ្ចប់សង្រ្គាមរបស់រុស្ស៊ី នៅអ៊ុយក្រែន ពេលចូលកាន់តំណែង។

ទីភ្នាក់ងារសារព័ត៌មាន Interfax Ukraine បានរាយការណ៍ថា នៅទីក្រុងប៊្រុចសែល ប្រទេសបែលហ្ស៊ិក រដ្ឋមន្ត្រីការបរទេស លោក Andriy Sybiha បានប្រាប់អ្នកសារព័ត៌មានថា នាយអគ្គសេនាធិការរបស់អ៊ុយក្រែន លោក Andriy Yermak បានស្ថិតនៅសហរដ្ឋអាមេរិករួចហើយ។

លោក Sybiha ដែលត្រូវបានដកស្រង់សម្តីដោយសារព័ត៌មាន Interfax Ukraine បាននិយាយថា៖ «ទំនាក់ទំនងនេះ នៅកម្រិតប្រមុខការិយាល័យ (ប្រធានាធិបតី) នេះ មានសារៈសំខាន់ខ្លាំងណាស់ សម្រាប់ការបង្កើតទំនាក់ទំនងជាមួយអ្នកតំណាងនៃរដ្ឋបាលថ្មី»។

គួរបញ្ជាក់ថា រហូតមកដល់ពេលនេះ លោក Trump បានគេចវេសមិនផ្តល់ព័ត៌មានលម្អិតអំពីផែនការរបស់លោក ក្នុងការបញ្ឈប់ការលុកលុយរយៈពេល ៣៣ខែ ប៉ុន្តែផែនការចំនួន ៣ ដែលបានដាក់ចេញដោយមនុស្សជិតស្និទ្ធនឹងលោកទាំងអស់ មើលឃើញថា ទស្សនវិស័យ ជុំវិញសមាជិកភាពអង្គការណាតូដែលទីក្រុងគិវចង់បានជាយូរមកហើយនោះ ត្រូវបានដកចេញពីការចរចា។

ហើយជាមួយគ្នានេះ សំណើដែលលើកឡើងដោយទីប្រឹក្សារបស់លោក Trump ក៏នឹងឃើញសម្បទាននូវដែនដីដ៏ធំទៅឲ្យក្រុងមូស្គូ ដែលកាន់កាប់ ១ភាគ៦នៃដែនដីអ៊ុយក្រែន៕