អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយនៅថ្ងៃពុធនេះថា ប្រទេសរុស្ស៊ីកំពុងតាមដានព្រឹត្តិការណ៍ នៅក្នុងប្រទេសកូរ៉េខាងត្បូង ដោយក្តីបារម្ភ បន្ទាប់ពីប្រធានាធិបតី បានប្រកាសច្បាប់អាជ្ញាសឹករយៈពេលខ្លី ប៉ុន្តែមិនមានការគំរាមកំហែងដល់ពលរដ្ឋរុស្ស៊ី នៅទីនោះទេ។

នៅថ្ងៃពុធនេះ សមាជិកសភាកូរ៉េខាងត្បូងបានដាក់សេចក្ដីស្នើច្បាប់ ដើម្បីចោទប្រកាន់ប្រធានាធិបតី លោក Yoon Suk Yeol បន្ទាប់ពីលោកបានប្រកាសច្បាប់អាជ្ញាសឹក មុនពេលលុបចោលចំណាត់ការនោះវិញ នៅប៉ុន្មានម៉ោងក្រោយមក ដោយបង្កឲ្យមានវិបត្តិនយោបាយ នៅក្នុងប្រទេសសេដ្ឋកិច្ចធំបំផុតទី៤ របស់អាស៊ី ដែលជាសម្ព័ន្ធមិត្តដ៏សំខាន់របស់សហរដ្ឋអាមេរិក។

លោក Zakharova បានប្រាប់សន្និសីទសារព័ត៌មានថា៖ «យើងកំពុងតាមមើលដោយក្តីបារម្ភ អំពីព្រឹត្តិការណ៍សោកនាដកម្ម ដែលកើតឡើងនៅប្រទេសកូរ៉េខាងត្បូង។ ស្ថានភាពនៅលើឧបទ្វីបកូរ៉េ មានភាពស្មុគស្មាញរួចទៅហើយ ដោយសារសកម្មភាពបង្កហេតុរបស់សហរដ្ឋអាមេរិក និងសម្ព័ន្ធមិត្តរបស់ខ្លួន»។

គួរបញ្ជាក់ថា ទីក្រុងមូស្គូបានពង្រឹងទំនាក់ទំនងកាន់តែស៊ីជម្រៅជាមួយប្រទេសជិតខាងរបស់ទីក្រុងសេអ៊ូល គឺកូរ៉េខាងជើង ចាប់តាំងពីសង្រ្គាមនៅអ៊ុយក្រែន ផ្ទុះឡើង ដោយនាំឲ្យមានក្ដីបារម្ភពីបណ្តាប្រទេសលោកខាងលិច។

ប្រធានាធិបតីរុស្ស៊ី លោក Vladimir Putin និងមេដឹកនាំកូរ៉េខាងជើង លោក គីម ជុងអ៊ុន បានចុះហត្ថលេខាលើសន្ធិសញ្ញាមួយ នៅទីក្រុងព្យុងយ៉ាង កាលពីខែមិថុនា ដែលរួមបញ្ចូលនូវលក្ខន្តិកការពារគ្នាទៅវិញទៅមក៕