ភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា បានថ្លែងអះអាងថា ភាពជោគជ័យនៃទំនាក់ទំនង រវាងប្រទេសកម្ពុជា និងប្រទេសចិន គឺឈរលើការអនុវត្តជាក់ស្តែង មិនមែនឈរលើការនិយាយនោះទេ ហើយមួយវិញទៀត មិត្តចិនមិនត្រឹមតែជាបង្អែករបស់កម្ពុជាក្នុងការអភិវឌ្ឍសេដ្ឋកិច្ច-សង្គមប៉ុណ្ណោះទេ ថែមទាំងពង្រឹងឯករាជ្យភាពកម្ពុជាខាងនយោបាយផងដែរ។

 ក្នុងកិច្ចជំនួបជាមួយឯកឧត្តម ចាវ ឡឺជី(ZHAO Leji) ប្រធានគណៈកម្មាធិការអចិន្ត្រៃយ៍ នៃសភាតំណាងប្រជាជន នៃសាធារណរដ្ឋប្រជាមានិតចិននៅព្រឹក ថ្ងៃទី៤ ខែធ្នូ ឆ្នាំ២០២៤ សម្តេចតេជោ ហ៊ុន សែន បានលើកឡើងថា ដំណើរទស្សនកិច្ចរបស់សម្តេចនៅចិននាពេលនេះ គឺមានគោលដៅពង្រឹងទំនាក់ទំនងបន្ថែមទៀតរវាងប្រទេសកម្ពុជា និងចិន ដែលឈានដល់ដំណាក់កាលថ្មីនៃភាពជាដៃគូយុទ្ធសាស្ត្រគ្រប់ជ្រង់ជ្រោយ ជាមិត្តដែកថែប និងកិច្ចសហប្រតិបត្តិការត្បូងពេជ្រជាដើម។

 សម្តេចតេជោ ហ៊ុន សែន បានបញ្ជាក់ថា«ជោគជ័យនៃទំនាក់ទំនងរបស់យើង ឈរលើការអនុវត្តជាក់ស្តែងមិនមែនឈរលើការនិយាយទេ ក្រោមការជំរុញនៃថ្នាក់ដឹកនាំប្រទេសទាំងពីរ»។ សម្តេចបានបន្ថែមទៀតថា «មិត្តចិន មិនត្រឹមតែជាបង្អែករបស់កម្ពុជាក្នុងការអភិវឌ្ឍសេដ្ឋកិច្ច សង្គម ថែមទាំងពង្រឹងឯករាជ្យភាពកម្ពុជាខាងនយោបាយប្រឈមនឹងសភាពការណ៍សកលលោក ដែលប្រែលប្រួលយ៉ាងឆាប់រហ័ស និងស្មុគស្មាញ»។ 

 ថ្លែងនៅក្នុងកិច្ចជំនួបនោះដែរ ឯកឧត្តម ចាវ ឡឺជីក្រោមការដឹកនាំរបស់ប្រធានាធិបតី Xi Jinping និងសម្តេចតេជោ ប្រទេសចិន និងកម្ពុជាបានបន្តអនុវត្តនៅកិច្ចព្រមព្រៀងនៃការកសាងសហគមន៍ជោគវាសនារួម ដែលមានគុណភាពខ្ពស់ កម្រិតខ្ពស់ និងស្តង់ដាខ្ពស់ក្នុងយុគសម័យថ្មី ហើយទន្ទឹមនេះក៏រួមចំណែកផងដែរដល់សន្តិភាព ស្ថិរភាព និងវិបុលភាពក្នុងតំបន់ និងពិភពលោក។ ឯកឧត្តមបានបន្ថែមទៀត ថាដំណើរទស្សនកិច្ចមិត្តភាព និងជាផ្លូវការរបស់សម្តេចតេជោនាពេលនេះ នឹងអនុញ្ញាតឱ្យបញ្ជូលកម្លាំងថ្មី ដើម្បីអនុវត្តគំនិតថ្មី និងផែនការសកម្មភាពកសាងសហគមន៍ជោគវាសនារួមឱ្យកាន់តែមានល្បឿនលឿនថែមទៀត។

 នៅក្នុងកិច្ចជំនួបនោះដែរ ឯកឧត្តម ចាវ ឡឺជី ក៏បានលើកឡើងផងដែរថា សម្តេចតេជោ បានផ្តល់យុត្តិធម៌ចំពោះការការពារផលប្រយោជន៍ស្នូលរវាងកម្ពុជា និងចិន ដែលបានកសាងមូលដ្ឋានទំនាក់ទំនង និងធ្វើកិច្ចសហប្រតិបត្តិការជាក់ស្តែង ហើយប្រទេសចិនគាំទ្រគណបក្សប្រជាជនកម្ពុចជា ឱ្យកាន់អំណាចរយៈពេលវែងផងដែរ៕

អត្ថបទ បាន ចក់