ប្រមុខអង្គការណាតូ (NATO) លោក Mark Rutte បានរិះគន់យ៉ាងខ្លាំងដល់ក្រុមហ៊ុនសព្វាវុធ នៅក្នុងសម្ព័ន្ធភាពដឹកនាំដោយសហរដ្ឋអាមេរិក នាថ្ងៃពុធ (ទី៤ ខែធ្នូ) នេះ ដោយនិយាយថា ពួកគេផលិតអាវុធតិចពេក គិតថ្លៃខ្ពស់ពេក និងដឹកជញ្ជូនយឺតពេក នៅពេលដែលអង្គការណាតូប្រឹងប្រែងគាំទ្រអ៊ុយក្រែន និងបង្កើនការការពារប្រឆាំងនឹងរុស្ស៊ី។

ដោយបណ្តាប្រទេសរបស់អង្គការណាតូ ប្រឈមនឹងសម្ពាធជាថ្មីពីប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump ដែលឲ្យង្កើនការចំណាយលើវិស័យការពារជាតិរបស់ពួកគេ លោក Rutte ក៏បាននិយាយផងដែរថា គោលដៅបច្ចុប្បន្ននៃទិន្នផលសេដ្ឋកិច្ច ២ភាគរយ នឹងមិនគ្រប់គ្រាន់ ដើម្បីទប់ស្កាត់ការវាយប្រហារនាពេលអនាគតបាននោះទេ។

យ៉ាងណាក្ដី លោក Rutte មិនបាននិយាយថា តើលោកគិតថា ៣ភាគរយ គួរតែជាគោលដៅថ្មី ដូចដែលលោក Trump បានទទូចដែរ ឬទេ។ តែទោះជាយ៉ាងណាក៏ដោយ លោកបាននិយាយថា អង្គការណាតូ មិនត្រឹមតែត្រូវចំណាយលើវិស័យការពារជាតិប៉ុណ្ណោះទេ ប៉ុន្តែថែមទាំងទទួលបានតម្លៃកាន់តែប្រសើរឡើងផងដែរ។

លោក Rutte ដែលជាអតីតនាយករដ្ឋមន្ត្រីហូឡង់ បាននិយាយថា៖ «យើងកំពុងផលិតមិនគ្រប់គ្រាន់ទេ តម្លៃខ្ពស់ពេក ហើយការដឹកជញ្ជូនយឺតពេក ដូច្នេះឧស្សាហកម្មការពារជាតិចាំបាច់ត្រូវផ្លាស់ប្តូរបន្ថែមទៀត ត្រូវធ្វើឲ្យខ្សែផលិតកម្មកាន់តែមានច្រើនឡើងបន្ថែមទៀត»៕