ភ្នំពេញ៖ បន្ទាប់ពីទឹកជំនន់កំពុងលិចលង់ផ្ទះបងប្អូនប្រជាពលរដ្ឋនៅក្នុងខណ្ឌដង្កោ រាជធានភ្នំពេញនោះ ឯកឧត្តម ឃួង សេង អភិបាលរាជធានីភ្នំពេញ និងឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានដឹកនាំកម្លាំងសមត្ថកិច្ច ចុះអន្តរាគមន៍ជួយសង្គ្រោះប្រជាពលរដ្ឋ ដោយព័ត៌មានបឋមបានបញ្ជាក់ថា ផ្ទះប្រជាពលរដ្ឋយ៉ាងតិច ២ពាន់ខ្នងត្រូវបានលិចលង់ ដោយក្នុងនោះ សង្កាត់ចំនួន២ទទួលរងផលប៉ះពាល់ធ្ងន់ធ្ងរ។
តាមរបាយការណ៍របស់អាជ្ញាធរខណ្ឌដង្កោរ បានបង្ហាញដល់ឯកឧត្តមឃួង ស្រេង ខណៈដឹកនាំកងកម្លាំងចុះអន្តរាគមន៍ជួយដល់បងប្អូនប្រជាពលរដ្ឋ ដែលរងគ្រោះដោយសារទឹកជំនន់នៅថ្ងៃទី២៦ ខែតុលានេះ បានឲ្យដឹងថា ទឹកជំនន់បានជន់លិចផ្ទះប្រជាពលរដ្ឋចំនួនជាង២ពាន់ខ្នងហើយ ស្ថិតនៅក្នុងចំនួន១០សង្កាត់ ដោយក្នុងនោះ ក៏មានសាលារៀនចំនួន៣៥ខ្នង ផ្លូវចំនួន០៣កន្លែង និងផ្ទៃដីកសិកម្មជាង១៥២ហិកតាផងដែរ។
ក្រោយពីទឹកជំនន់បានកំពុងហូរចូលផ្ទះបងប្អូនប្រជាពលរដ្ឋជាបន្តបន្ទាបន់នោះ ឯកឧត្តមអភិបាលរាជធានីភ្នំពេញ និងឯកឧត្តមស្នងការ បានធ្វើដំណើរចុះត្រួតពិនិត្យស្ថានភាពទឹកស្ទឹងព្រែកត្នោតជាក់ស្តែងនៅក្នុងសង្កាត់ទៀន និងសង្កាត់ស្ពានថ្ម ដោយសង្កាត់ទាំង២នេះកំពុងប្រឈមរងការជន់លិចធ្ងន់ធ្ងរក្នុងចំណោមសង្កាត់នានាក្នុងខណ្ឌដង្កោ។
ក្នុងឱកាសចុះត្រួតពិនិត្យ ស្ថានភាពទឹកជំនន់នេះ ឯកឧត្ដមអភិបាលរាជធានីភ្នំពេញ បានបញ្ជា ឲ្យយកគ្រឿងចក្រមួយចំនួនកាយដីបិទទប់ទឹកនៅកន្លែងខ្លះ ដែលកំពុងប្រឈមទឹកហូរបុកបាក់ទំនប់ដែលគ្រឿងចក្របិទទប់ កុំឱ្យហូរហៀរទៅលិចផ្ទះនិងផ្ទៃដីកសិកម្មប្រជាពលរដ្ឋនៅផ្នែកខាងក្រោម នៅខណៈដែលទឹកស្ទឹងព្រែកត្នោតកំពុងហូរបុកយ៉ាងគំហុកនោះ។
យ៉ាងណាក៏ដោយរហូតដល់រសៀលថ្ងៃទី២៦ ខែតុលានេះដែរ ស្ថានភាពទឹកស្ទឹងព្រែកត្នោតនៅនឹងមិនមានការកើនឡើងបន្ថែមទៀតនោះទេ ខណៈអាជ្ញាធរ មន្ត្រីជំនាញ និងសមត្ថកិច្ចកំពុងតែតាមដានយកចិត្តទុកដាក់ ដោយមានការប្រុងប្រយ័ត្នខ្ពស់បំផុត ក្នុងការត្រៀមជួយសង្គ្រោះប្រជាពលរដ្ឋក្នុងករណីទឹកស្ទឹងព្រែកត្នោតនៅតែបង្កគំរាមកំហែងដែលបង្កគ្រោះថ្នាក់ជាយថាហេតុណាមួយនោះ។
សូមបញ្ជាក់ថា ទឹកជំនន់ស្ទឹងព្រែកត្នោតបានបង្កការជន់លិចផ្ទះ ដីកសិកម្ម សាលារៀនផ្លូវថ្នល់ក្នុងភូមិសាស្ត្រខណ្ឌដង្កោ គឺទឹកហូរធ្លាក់យ៉ាងគំហុកពីខេត្តកំពង់ស្ពឺ ចាប់ផ្តើមជន់លិចរយៈពេល ២ទៅ៣ថ្ងៃចុងក្រោយនេះ៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
