អ្នកនាំពាក្យកងទ័ពអ៊ីស្រាអែល លោក Daniel Hagari បាននិយាយកាលពីថ្ងៃពុធ ទី៤ ខែធ្នូ ថា ការវាយប្រហាររបស់អ៊ីស្រាអែល ទំនងជាបណ្តាលឱ្យក្រុមសកម្មប្រយុទ្ធហាម៉ាស សម្លាប់ចំណាប់ថ្នូរ៦នាក់ នៅតំបន់ហ្កាហ្សា កាលពីខែកុម្ភៈ។

កាលពីពេលមុន កងទ័ពបាននិយាយនៅក្នុងសេចក្តីថ្លែងការណ៍ថា ការស្លាប់របស់ចំណាប់ថ្នូរអ៊ីស្រាអែល៦នាក់ ដែលសាកសពត្រូវបានរកឃើញពីតំបន់ហ្កាហ្សាក្នុងខែសីហា ប្រហែលជាជាប់ទាក់ទងទៅនឹងការវាយប្រហារតាមអាកាសរបស់អ៊ីស្រាអែលប្រឆាំងក្រុមហាម៉ាស នៅជិតកន្លែងដែលចំណាប់ថ្នូរត្រូវបានឃុំខ្លួន។

យោធាបាននិយាយនៅក្នុងសេចក្តីថ្លែងការណ៍ អំពីការស៊ើបអង្កេតលើការស្លាប់របស់ចំណាប់ថ្នូរ ថា «នៅពេលនៃការវាយប្រហារ យោធាពុំមានព័ត៌មានសូម្បីតែការសង្ស័យ ដែលថាចំណាប់ថ្នូរស្ថិតនៅក្នុងបរិវេណក្រោមដី ឬតំបន់ជុំវិញនោះ។

យោធា និយាយថា ការវាយប្រហារតាមអាកាស បានកើតឡើងកាលពីខែកុម្ភៈ ខណៈសាកសពរបស់ចំណាប់ថ្នូរត្រូវបានរកឃើញនៅចុងខែសីហា។

វីដេអូដែលចេញផ្សាយដោយកងទ័ពអ៊ីស្រាអែលកាលពីថ្ងៃពុធ បានបង្ហាញពីសេចក្តីសង្ខេបនៃការស៊ើបអង្កេតទាក់ទងនឹងការស្លាប់របស់ចំណាប់ថ្នូរទាំង៦នាក់ នៅក្នុងផ្លូវរូងក្រោមដីរបស់ក្រុមហាម៉ាសក្នុងទីក្រុង Khan Younis ។