យោងតាមសកម្មជន និងក្រុមគ្រូពេទ្យសង្គ្រោះបឋម បានឲ្យដឹងថា ការបាញ់ផ្លោង បានបន្តកើតឡើង នៅជំរំជម្លៀសខ្លួន Zamzam ដែលរងគ្រោះដោយទុរ្ភិក្ស កាលពីថ្ងៃពុធ ទី៤ ខែធ្នូ បន្ទាប់ពីមានស្ថានភាពស្ងប់ស្ងាត់កាលពីថ្ងៃមុន ជាការវាយប្រហារធ្វើឡើងដោយកងកម្លាំងគាំទ្ររហ័ស។ ទីភ្នាក់ងារជំនួយផ្នែកវេជ្ជសាស្រ្ដ MSF បាននិយាយថា មនុស្សប្រាំពីរនាក់បានរងរបួស បន្ទាប់ពីគ្រាប់ផ្លោងត្រូវបានបាញ់ធ្លាក់ទៅលើជំរំមានប្រជាជនរស់នៅច្រើន ដែលដាក់មនុស្សស្នាក់នៅយ៉ាងហោចណាស់កន្លះលាននាក់។ គណៈកម្មាធិការតស៊ូនៅទីក្រុង al-Fashir បាននិយាយថា ការបាញ់ផ្លោង បានចាប់ផ្តើមកាលពីថ្ងៃពុធ។

អង្គការទេសន្តប្រវេសន៍អន្តរជាតិ បាននិយាយថា កងកម្លាំងគាំទ្ររហ័សយោធាប៉ារ៉ា(RSF) ដែលកំពុងប្រយុទ្ធជាមួយកងទ័ពដើម្បីគ្រប់គ្រងក្បែរទីក្រុង al-Fashir រដ្ឋធានីនៃរដ្ឋ North Darfur បានចាប់ផ្តើមវាយប្រហារលើជំរំកាលពីថ្ងៃអាទិត្យ និងថ្ងៃចន្ទ។ មនុស្សជាង២.០០០នាក់ បានរត់ភៀសខ្លួន បណ្តាលមកពីការវាយប្រហារទាំងនេះ ។

ជនភៀសខ្លួនស៊ូដង់ បាននិយាយថា «មានការលំបាក និងការរងទុក្ខជាច្រើននៅជំរំនេះ រឿងមួយក្នុងចំណោមរឿងរ៉ាវជាច្រើន គឺប្រជាជននៅទីនេះកំពុងទទួលទានកាកសំណល់ សំបកសណ្ដែកដី និងចំណីសត្វ។

កាលពីខែសីហា អ្នកជំនាញសន្តិសុខស្បៀងអាហារពិភពលោកបានប្រកាសថា ជំរំ Zamzam កំពុងជួបប្រទះទុរ្ភិក្ស។ ចាប់តាំងពីពេលនោះមក កម្មវិធីស្បៀងអាហារពិភពលោក អាចផ្តល់ជំនួយស្បៀងអាហារមួយចំនួន ប៉ុន្តែកាលពីថ្ងៃពុធ បាននិយាយថា ការដឹកជញ្ជូនជំនួយបន្ថែមទៀត ត្រូវបានរំខាន។

ការវាយប្រហារអាចពន្យារពេលការទៅដល់នៃក្បួនដឹកជំនួយរបស់កម្មវិធីស្បៀងអាហារពិភពលោក(WFP) ដែលកំពុងធ្វើដំណើរទៅកាន់ជំរំនោះ។