រថក្រោះអ៊ីស្រាអែល បានវាយរុញចូលទៅក្នុងផ្នែកភាគខាងជើងនៃតំបន់ ខាន់យូនីស (Khan Younis) ដែលនៅភាគខាងត្បូងតំបន់ហ្កាហ្សាស្រ្ទីប កាលពីថ្ងៃពុធ (០៤ ធ្នូ) ហើយក្រុមគ្រូពេទ្យប៉ាឡេស្ទីនបាននិយាយថា ការវាយប្រហារតាមអាកាសរបស់អ៊ីស្រាអែលកាន់តែខ្លាំងក្លា បានសម្លាប់មនុស្សយ៉ាងហោចណាស់ ៤៧នាក់ នៅទូទាំងតំបន់ហ៊ុមព័ទ្ធនេះ។

អ្នកស្រុកនិយាយថា រថក្រោះបានបន្តវាយរុល មួយថ្ងៃបន្ទាប់ពីយោធាអ៊ីស្រាអែល បានចេញបញ្ជាជម្លៀសថ្មី ដោយនិយាយថាមានការបាញ់រ៉ូកែតដោយពួកសកម្មប្រយុទ្ធប៉ាឡេស្ទីនចេញពីតំបន់នោះ។

ជាមួយនឹងគ្រាប់ផ្លោងធ្លាក់នៅជិតតំបន់លំនៅដ្ឋាន ក្រុមគ្រួសារប៉ាឡេស្ទីនបានភៀសខ្លួន ហើយធ្វើដំណើរឆ្ពោះទៅទិសខាងលិចទៅកាន់តំបន់មនុស្សធម៌ អាល់-ម៉ាវ៉ាស៊ី (Al-Mawasi) ដែលត្រូវបានកំណត់នៅក្បែរនោះ។ ក្រុមមន្ត្រីប៉ាឡេស្ទីន និងអង្គការសហប្រជាជាតិ បាននិយាយថា មិនមានតំបន់សុវត្ថិភាពនៅសេសសល់ទៀតឡើយក្នុងតំបន់ហ្លាហ្សា ហើយភាគច្រើននៃប្រជាជនចំនួន ២,៣ លាននាក់ត្រូវបានជម្លៀសជាច្រើនដង។

អ្នកស្រុកប៉ាឡេស្ទីននិយាយថា កងទ័ពអ៊ីស្រាអែល កំពុងព្យាយាមបណ្តេញប្រជាជនចេញពីជាយភាគខាងជើងនៃតំបន់ហ្កាហ្សា ជាមួយនឹងការជម្លៀសដោយបង្ខំ និងការទម្លាក់គ្រាប់បែកដើម្បីបង្កើតតំបន់ទ្រនាប់។ កងទ័ពអ៊ីស្រាអែល បានបដិសេធការលើកឡើងនេះ ហើយនិយាយថាខ្លួនត្រឡប់ទៅវិញដើម្បីរារាំងក្រុមយុទ្ធជនហាម៉ាស មិនឱ្យប្រមូលផ្តុំគ្នាជាក្រុមឡើងវិញនៅក្នុងតំបន់ដែលខ្លួនបានបោសសម្អាតពួកគេពីមុនមកប៉ុណ្ណោះ៕