យោធាអ៊ីស្រាអែល បាននិយាយថា អ្នកតាំងលំនៅអ៊ីស្រាអែល បានវាយប្រហារនៅទីក្រុងក្នុងដែនដីប៉ាឡេស្ទីនចំនួនពីរ កាលពីថ្ងៃពុធ ទី៤ ខែធ្នូ ដោយបានដុតបំផ្លាញទ្រព្យសម្បត្តិ និងគប់ដុំថ្ម បន្ទាប់ពីនគរបាល បានព្យាយាមរុះរើកន្លែងតាំងលំនៅខុសច្បាប់មួយកន្លែង នៅតំបន់កាន់កាប់ West Bank ។

នគរបាល និងអង្គភាពសេវាចារកម្មក្នុងស្រុក Shin Bet បាននិយាយថា ពួកគេបានចាប់ខ្លួនមនុស្ស ៨ នាក់ ពីបទវាយទៅលើកងកម្លាំងសន្តិសុខ និងធ្វើឱ្យខូចខាតទ្រព្យសម្បត្តិ។

មន្ត្រីប៉ាឡេស្ទីន និយាយថា អ្នកតាំងលំនៅ បានដុតផ្ទះមួយខ្នង និងរថយន្តពីរគ្រឿង នៅក្នុងក្រុង Hawara ជាទីប្រជុំជនមួយនៅជិតទីក្រុង Nablus ដែលត្រូវបានកំណត់គោលដៅកាលពីពេលមុន ដោយអ្នកតាំងលំនៅនិយមជ្រុលដែលចង់ឱ្យអ៊ីស្រាអែល អះអាងដែនអធិបតេយ្យភាពលើទឹកដីតំបន់ West Bank ទាំងអស់។

យោធាអ៊ីស្រាអែល បាននិយាយថា ក្រុមអ្នកតាំងលំនៅមួយក្រុម បានប្រឈមមុខជាមួយកងកម្លាំងរបស់ខ្លួន និងនគរបាល។

យោងតាមអង្គការសហប្រជាជាតិ បានឲ្យដឹងថា អ្នកតាំងលំនៅជនជាតិអ៊ីស្រាអែល ជាង៧០០.០០០នាក់ បច្ចុប្បន្ននេះ រស់នៅស្ថិតក្នុងចំណោមពលរដ្ឋប៉ាឡេស្ទីន៣ លាននាក់នៅតំបន់ West Bank និងទីក្រុង East Jerusalem ជាដែនដីដែលអ៊ីស្រាអែល ដណ្តើបានក្នុងឆ្នាំ១៩៦៧។

ប្រទេសភាគច្រើន បានចាត់ទុកការតាំងលំនៅ ដែលបានសាងសង់នៅលើដែនដីនេះ ថាខុសច្បាប់។