ក្រសួងហិរញ្ញវត្ថុអ៊ុយក្រែន បានប្រកាសកាលពីថ្ងៃពុធថា អ៊ុយក្រែន បានចុះហត្ថលេខាលើកិច្ចព្រមព្រៀងជាមួយសហភាពអឺរ៉ុប (EU) ដើម្បីទទួលបានប្រាក់រហូតដល់៣៥ពាន់លានអឺរ៉ូ (ប្រហែល៣៦,៧ពាន់លានដុល្លារអាមេរិក) ក្នុងជំនួយម៉ាក្រូហិរញ្ញវត្ថុ(MFA)។

អនុស្សរណៈនៃការយោគយល់ និងកិច្ចព្រមព្រៀងប្រាក់កម្ចី ត្រូវបានចុះហត្ថលេខាដោយប្រធានធនាគារជាតិអ៊ុយក្រែន លោក Andriy Pyshnyy រដ្ឋមន្ត្រីក្រសួងហិរញ្ញវត្ថុ លោក Sergii Marchenko និងអនុប្រធានគណៈកម្មការអឺរ៉ុប លោក Valdis Dombrovskis ។

នៅក្រោមកិច្ចព្រមព្រៀងនានា មូលនិធិនេះ នឹងត្រូវបានផ្តល់ជាប្រាក់កម្ចី ក្រោមក្រុមនៃប្រាក់កម្ចីបង្កើនល្បឿនប្រាក់ចំណូលវិសាមញ្ញរបស់ក្រុមប្រទេសទាំងប្រាំពីរ សម្រាប់អ៊ុយក្រែនដែលគាំទ្រដោយប្រាក់ចំណូលនាពេលអនាគត បានមកពីទ្រព្យសម្បត្តិបង្កករបស់រុស្ស៊ី នៅក្នុងសហភាពអឺរ៉ុប។

ក្រសួង បានបញ្ជាក់ថា អ៊ុយក្រែននឹងមិនប្រើប្រាស់ធនធានក្នុងស្រុកដើម្បីសងប្រាក់កម្ចីនេះទេ។

ក្រសួងបាននិយាយនៅក្នុងសេចក្តីថ្លែងការណ៍ថា «វាត្រូវបានគេរំពឹងថាមូលនិធិជំនួយម៉ាក្រូហិរញ្ញវត្ថុ(MFA) ទាំងអស់សម្រាប់អ៊ុយក្រែន នឹងស្ថិតនៅលើមូលដ្ឋានមិនសងត្រឡប់» ។

ដើម្បីទទួលបានមូលនិធិនេះ អ៊ុយក្រែនត្រូវតែបំពេញលក្ខខណ្ឌចំនួន១៤ចំណុច រួមមានទាំងកំណែទម្រង់ក្នុងស្ថិរភាពម៉ាក្រូហិរញ្ញវត្ថុ សហគ្រាសដំណើរការដោយរដ្ឋ រដ្ឋបាលសាធារណៈ ថាមពល នីតិរដ្ឋ ការប្រឆាំងអំពើពុករលួយ និងឧស្សាហកម្មការពារជាតិ។

ចាប់តាំងពីការចាប់ផ្តើមជម្លោះទ្រង់ទ្រាយធំជាមួយរុស្ស៊ីមក អ៊ុយក្រែន បានទទួលជំនួយហិរញ្ញវត្ថុប្រហែល ៤០,៥ ពាន់លានដុល្លារពីសហភាពអឺរ៉ុប។