បាល់ទាត់៖ លោក Keisuke Honda អ្នកចាត់ការ​ទូទៅ​ក្រុម​ជម្រើសជាតិ​កម្ពុជាបាន​ប្រាប់​កីឡាករ​យុវជន​អាយុ​ក្រោម ២៣​ឆ្នាំ​កម្ពុជាត្រូវមាន​ភាព​ស្រេក​ឃ្លាន​ចង់​រីកចម្រើន ៣​ចំណុចដើម្បី​ពង្រឹង​សម្រួច​សមត្ថភាព​ត្រៀម​ស៊ី​ហ្គេមឆ្នាំ​២០២៣ នៅ​កម្ពុជា។​ ​ការលើកឡើង​នេះបន្ទាប់ពី​ក្រុម​ជម្រើសជាតិ U23 កម្ពុជាបានបញ្ចប់​បេសកកម្ម​ក្នុងការ​ប្រកួត​ជម្រុះ​ពានរង្វាន់ AFC U23 Asian Cup Uzbekistan 2022-Qualifiers ខណៈ​ប្រកួត​ចុងក្រោយចាញ់​ក្រុម​ម្ចាស់ផ្ទះ​ជប៉ុន ៤-០ កាលពី​ម្សិលមិញ។​

លោក Honda បាន​ប្រាប់​កូនក្រុម​របស់ខ្លួន​ថា វា​មិនមែនជា​ការប្រកួត​ដ៏​អាក្រក់​នោះទេ ដ្បិត​កីឡាករ​កម្ពុជាបានបង្ហាញ​ទៅ​ពួកគេ​ពី​ការលេង​ល្អ​ខ្លះ​ដែរ។ ប៉ុន្ដែ​ពួកយើង​ត្រូវ​កែតម្រូវ​ការលេង​របស់​យើង​ជាច្រើន​ទៀត ព្រោះ​យើង​ត្រូវ​លេង​ជាមួយ​ក្រុម​ដែលមាន​កម្រិត​ស្មើ​ជប៉ុន​នៅ​ស៊ី​ហ្គេមឆ្នាំ​២០២៣។ យើង​មាន​ពេល​តែមួយ​ឆ្នាំ​ជាង​ទៀត​ទេ។ ដូច្នេះ​យើង​មិនមាន​ពេល​ច្រើន​ទេ។​ ​អតីត​សមាជិក​ក្រុម​ស៊ាំ​ម៉ូ​រ៉ៃ​ជប៉ុន​ដដែលបាន​សង្កត់ធ្ងន់ថា ទាំង​ផ្នែក​កលល្បិច (Tactics) ផ្នែក​បច្ចេកទេស និង​ផ្នែក​កាយសម្បទា កីឡាករ​ទាំងអស់ត្រូវមាន​ភាព​ស្រេកឃ្លាន​ចង់​រីកចម្រើន​នូវ​សមត្ថភាពនៃ​ផ្នែក​ទាំង ៣ នេះ​ជា​រៀងរាល់ថ្ងៃ។

​គួរ​ដឹងថា ក្រុម U23 កម្ពុជាធ្វើបាន​យ៉ាង​ល្អក្នុងការ​ប្រកួត​ជាមួយ​ក្រុម U23 ហុងកុងដោយបាន​យកឈ្នះ ៤-២ ក្នុងជំនួប​បើកឆាក​ពូ​ល K មុន​បរាជ័យ​ក្រោម​ថ្វី​ជើង​ក្រុម​ខ្លាំង​ជប៉ុន ៤-០ កាលពី​ម្សិលមិញ។ ការណ៍​នេះនាំ​ឲ្យ​កម្ពុជា​ត្រូវ​រង់ចាំ​មើល​លទ្ធផល​ប្រកួត​បញ្ច​ប់ពូ​លរវាង​ជប៉ុន និង​ហុងកុង ក៏ដូចជា​លទ្ធផល​ពូ​ល​ផ្សេងៗ​ទៀតដើម្បី​ដឹង​ពី​ជោគវាសនា​របស់ខ្លួន បាន​ឡើងទៅ​វគ្គបន្តនៃ​ពានរង្វាន់ AFC U23 Asian Cup 2022 ឬក៏​អត់៕

​អត្ថបទ៖ លី ឈុន​ឡា