កងទ័ពជើងទឹកបារាំង បានជួយសង្គ្រោះជនអន្តោប្រវេសន៍ចំនួន ៨៥នាក់ ដែលព្យាយាមឆ្លងទន្លេ Channel ពីប្រទេសបារាំងទៅកាន់ប្រទេសអង់គ្លេស កាលពីថ្ងៃពុធ ជាការឆ្លងចុងក្រោយបំផុតដ៏គ្រោះ ថ្នាក់។

កងទ័ពជើងទឹកឈរជើងនៅសមុទ្រ North Sea និងទន្លេ Channel របស់ប្រទេសបារាំង បាននិយាយនៅក្នុងសេចក្តីថ្លែងការណ៍មួយថា ទូកជនអន្តោប្រវេសន៍មួយគ្រឿងក្នុងចំណោមទូក«ជាច្រើន»ដែលចេញដំណើរទៅសមុទ្រ បានអំពាវនាវរកជំនួយ បន្ទាប់ពីបានបុកច្រាំងខ្សាច់នៅតំបន់ Pas-de-Calais។

ទូកក្តោងមួយរបស់កងទ័ពជើងទឹក បានជួយសង្គ្រោះអ្នកដំណើរ ៨០នាក់ ចេញពីទូកនោះ និង ៥នាក់ផ្សេងទៀតពីនាវាអន្តោប្រវេសន៍ទី២ នៅឯទីតាំងមួយផ្សេងទៀត។

ជនអន្តោប្រវេសន៍ទាំងនោះ ត្រូវបាននាំត្រឡប់ទៅដីគោក នៅទីក្រុង Boulogne-sur-Mer ហើយចូលរួមដោយសេវាសង្គ្រោះបន្ទាន់ និងនគរបាលព្រំដែន។

យោងតាមអាជ្ញាធរតំបន់ Pas-de-Calais បានឲ្យដឹងថា ជនអន្តោប្រវេសន៍ជាង ៧០នាក់ បានស្លាប់ដោយសារព្យាយាមឆ្លងទន្លេ ទៅកាន់ប្រទេសអង់គ្លេស ក្នុងឆ្នាំនេះ។

មនុស្សរាប់ម៉ឺននាក់ទៀត បានទៅដល់ប្រទេសអង់គ្លេស ដែលរដ្ឋាភិបាលរបស់ពួកគេ បានប្តេជ្ញាបង្ក្រាបក្រុមជនអន្ធពាលរត់ពន្ធមនុស្ស។

នៅប្រទេសអាល្លឺម៉ង់ កាលពីថ្ងៃពុធ នគរបាលបានធ្វើការវាយឆ្មក់មុនពេលថ្ងៃរះ ដោយបានកំណត់គោលដៅលើបណ្តាញឧក្រិដ្ឋជនស៊ីរី និងឃើដ-អ៊ីរ៉ាក់ ដែលត្រូវបានសង្ស័យថា បានរត់ពន្ធជនអនោ្តប្រវេសន៍តាមទូកពីប្រទេសបារាំង ទៅកាន់ចក្រភពអង់គ្លេស។