បាល់ទាត់៖ ពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ជាតិ) ឆ្នាំ២០២១ គ្រោងនឹងចាប់ផ្ដើមការប្រកួតនាថ្ងៃទី៩ ខែវិច្ឆិកាខាងមុខជាមួយការកែប្រែនូវប្រព័ន្ធប្រកួតថ្មីខ្លីជាងមុន ដោយគ្រោងប្រើពេលត្រឹមតែ ១៧ថ្ងៃប៉ុណ្ណោះដើម្បីកំណត់រកក្រុមជើងឯក ពោលគឺការប្រកួតគ្រោងនឹងបញ្ចប់នៅថ្ងៃទី២៥ ខែវិច្ឆិកា ឆ្នាំ២០២១។
យោងតាមមន្ដ្រីគណៈកម្មការរៀបចំការប្រកួតបានឲ្យដឹងថា ពានរង្វាន់សម្ដេចតេជោ ហ៊ុន សែន-ថ្នាក់ជាតិឆ្នាំនេះនឹងប្រើរូបមន្ដប្រកួតចាញ់-ធ្លាក់តែម្ដងសម្រាប់វគ្គ ១៦ក្រុម និងវគ្គ ៨ក្រុម ខណៈវគ្គពាក់កណ្ដាលផ្ដាច់ព្រ័ត្រ ឬវគ្គ ៤ក្រុមចុងក្រោយ ក្រុមឈ្នះនឹងត្រូវឡើងទៅជួបគ្នាដណ្ដើមជើងឯក ខណៈក្រុមចាញ់នឹងត្រូវប្រកួតដណ្ដើមចំណាត់ថ្នាក់លេខ៣។ ចំពោះកម្មវិធីប្រកួត គណៈកម្មការបានរៀបចំរួចរាល់ផងដែរសម្រាប់ ១៦ក្រុមចុងក្រោយនៃពានថ្នាក់ជាតិនេះ រួមមានព្រះខ័នរាជស្វាយរៀងត្រូវជួបក្រុមជើងឯកពានសម្ដេចតេជោ ហ៊ុន-ថ្នាក់ខេត្តឆ្នាំ២០២១ គឺក្រុមកោះកុងអេហ្វស៊ី ខណៈក្រុមភ្នំពេញក្រោនត្រូវជួបខេត្តត្បូងឃ្មុំ, ក្រុមការពារតំណែងជើងឯកវិសាខាជួបខេត្តបន្ទាយមានជ័យ និងក្រុមណាហ្គាវើលដ៏ជួបក្រុមនគរបាលជាតិនៅថ្ងៃទី៩ ខែវិច្ឆិកាជាមួយគ្នា។
រីឯ ៤គូទៀតនឹងត្រូវប្រកួតនៅថ្ងៃទី១០ ខែវិច្ឆិការួមមានក្រុមបឹងកេតជួបក្រុមសូលទីឡូអង្គរ, ក្រុមអង្គរថាយហ្គឺរជួបក្រុមព្រៃវែងអេហ្វស៊ី, ក្រុមកងយោធពលខេមរភូមិន្ទជួបក្រុមអគ្គិសនីកម្ពុជា និងក្រុមគិរីវង់សុខសែនជ័យជួបក្រុមអាស៊ីអឺរ៉ុបយូណាយធីត។ អ្វីដែលគួរឲ្យកត់សម្គាល់ក្នុងចំណោម ៨ប្រកួតនេះភាគច្រើននឹងប្រកួតនៅភ្នំពេញ លើកលែងព្រះខ័នរាជស្វាយរៀង និងគិរីវង់ដែលត្រូវប្រកួតលើទឹកដីរៀងៗខ្លួន។ សូមបញ្ជាក់ថា ការកែប្រែប្រព័ន្ធប្រកួតថ្មីនេះធ្វើឡើងក្រោយការប្រកួតពានរង្វាន់ថ្នាក់ខេត្ត ត្រូវបានពន្យារពេលជាយូរដោយសារវិបត្តិកូវីដ-១៩។ ចំពោះការប្រកួតពានរង្វាន់សម្ដេចតេជោ ហ៊ុន សែន-ថ្នាក់ជាតិនេះដែរ ប្រសិនបើអាចដំណើរការរលូន និងបញ្ចប់តាមផែនការ ក្រុមទទួលបានជើងឯកនឹងទទួលបានកៅអីចូលរួមប្រកួតវគ្គជម្រុះ Play-Off នៃពានរង្វាន់ AFC Cup 2022 ទៀតផង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
