អនុរដ្ឋមន្រ្តីការពារជាតិកូរ៉េខាងត្បូងនិយាយនៅថ្ងៃព្រហស្បតិ៍នេះថា អតីតរដ្ឋមន្រ្តីការពារជាតិកូរ៉េខាងត្បូងលោក Kim Yong-hyun ដែលបានលាលែងជុំវិញការប៉ុនប៉ងពុំបានសម្រេចរបស់លោកប្រធានាធិបតី Yoon Suk Yeol ក្នុងការដាក់ច្បាប់អាជ្ញាសឹកនោះ បានបញ្ជាឲ្យដាក់ពង្រាយទាហានទៅឡោមព័ទ្ធបរិវេនសភា ។

មេបញ្ជាការកងទ័ពច្បាប់អាជ្ញាសឹកកូរ៉េខាងត្បូង លោក Park An-su និយាយថា លោកគ្មានបំណងកាន់អាវុធប្រឆាំងសាធារណជននោះទេ ខណៈលោក Kim Seon Ho គឺជាអនុរដ្ឋមន្រ្តីការពារជាតិកូរ៉េខាងត្បូង និយាយថា គ្មានគ្រាប់ពិតត្រូវបានផ្តល់ជូនទាហានទាំងអស់នោះដែរ ។

នៅថ្ងៃព្រហស្បតិ៍នេះ សភាកូរ៉េខាងត្បូង ណែនាំឲ្យមានញត្តិចោទប្រកាន់លោក Yoon ជុំវិញការប៉ុនប៉ងពុំបានសម្រេចរបស់លោក ដើម្បីដាក់ច្បាប់អាជ្ញាសឹក ខណៈរដ្ឋមន្រ្តីការពារជាតិរងការស្តីបន្ទោសសម្រាប់ការណែនាំឲ្យមានវិធានការខាងលើ និងបញ្ជាឲ្យទាហានឡោមព័ទ្ធបរិវេនសភា បានលាលែងពីតំណែង ។

អ្នកនាំពាក្យគណបក្ស និយាយប្រាប់ក្រុមអ្នកសារព័ត៌មានថា ក្រុមតំណាងរាស្រ្តមកពីគណបក្សប្រឆាំងប្រជាធិបតេយ្យ គ្រោងនឹងបោះឆ្នោតនៅក្នុងសភា ដើម្បីចោទប្រកាន់លោក Yoon នៅវេលាម៉ោង ៧ល្ងាច ម៉ោងក្នុងស្រុក ថ្ងៃសៅរ៍ខាងមុខនេះ ។

ដោយឡែក គណបក្សកាន់អំណាច គឺគណបក្សអំណាចប្រជាជនរបស់លោក Yoon មានការបែងចែកចំពោះវិបត្តិមួយនេះ ប៉ុន្តែពួកគេនិយាយថា ពួកគេនឹងជំទាស់រាល់ការចោទប្រកាន់ រយៈពេល ២ឆ្នាំសេសសល់ក្នុងអាណត្តិ ៥ឆ្នាំរបស់លោក Yoon ៕