ប្រភពចំនួន ២ ដែលដឹងពីស្ថានការណ៍ បានប្រាប់សារព័ត៌មាន Reuters នៅថ្ងៃព្រហស្បតិ៍ (ទី៥ ខែធ្នូ) នេះថា មេដឹកនាំកោះតៃវ៉ាន់ លោក Lai Ching-te បានជជែកតាមទូរសព្ទជាមួយប្រធានសភាអាមេរិក លោក Mike Johnson អំឡុងដំណើរទស្សនកិច្ចរបស់លោក Lai ទៅកាន់តំបន់ប៉ាស៊ីហ្វិក ដែលព័ត៌មាននេះទំនងជាធ្វើឲ្យទីក្រុងប៉េកាំងមិនរីករាយនោះឡើយ។

ការិយាល័យរបស់មេដឹកនាំកោះតៃវ៉ាន់ មិនបានឆ្លើយទូរសព្ទភ្លាមៗនោះទេ សម្រាប់ការស្វែងរកការអត្ថាធិប្បាយ។ ហើយការិយាល័យរបស់លោក Johnson ក៏មិនបានឆ្លើយតបដូចគ្នាដែរ សម្រាប់សំណើសុំការអត្ថាធិប្បាយតាមអ៊ីម៉ែល (សារអេឡិចត្រូនិក)។ ប្រភពមួយ ក្នុងចំណោមប្រភពនោះ បាននិយាយថា ការហៅទូរសព្ទនេះ បានកើតឡើងនៅរសៀលថ្ងៃពុធ (ទី៤ ខែធ្នូ) ម៉ោងនៅសហរដ្ឋអាមេរិក ដោយបន្ថែមថា នេះ មិនគួរជាហេតុផល ដើម្បីឲ្យចិនបង្កើនការបំភិតបំភ័យផ្នែកយោធារបស់ខ្លួន ចំពោះកោះតៃវ៉ាន់នោះឡើយ។

គួរបញ្ជាក់ថា ប្រភពនានាដែលដឹងអំពីស្ថានការណ៍ បានប្រាប់សារព័ត៌មាន Reuters ថា ចិនអាចចាប់ផ្តើមធ្វើសមយុទ្ធថ្មី ដើម្បីឆ្លើយតបទៅនឹងការធ្វើដំណើររបស់ Lai ទៅកាន់តំបន់ប៉ាស៊ីហ្វិក ជាកន្លែងដែលលោកបានឈប់សំចតនៅកោះហាវ៉ៃ និងដែនដីហ្គាមរបស់សហរដ្ឋអាមេរិក។

ប្រទេសចិនបានចាត់ទុកកោះតៃវ៉ាន់ដែលគ្រប់គ្រងដោយលទ្ធិប្រជាធិបតេយ្យថា ជាចំណែកនៃដែនដីរបស់ខ្លួន ហើយបានថ្កោលទោសសហរដ្ឋអាមេរិក ដែលអនុញ្ញាតលោក Lai ឆ្លងកាត់ទឹកដីរបស់ខ្លួន។ លោក Lai ច្រានចោលការទាមទារអធិបតេយ្យភាពរបស់ចិន៕