អនុរដ្ឋមន្ត្រីការបរទេសគុយបា កាលពីថ្ងៃពុធ (ទី៤ ខែធ្នូ) បាននិយាយថា សំណើរបស់ប្រធានាធិបតីជាប់ឆ្នោតអាមេរិក លោក Donald Trump ដើម្បីឲ្យមានការនិរទេសដ៏ធំ ចំពោះជនអន្តោប្រវេសន៍ដែលរស់នៅដោយខុសច្បាប់ នៅសហរដ្ឋអាមេរិក ក្នុងនោះអាចរាប់បញ្ចូលទាំងជនជាតិគុយបាផងដែរនោះ គឺមិនប្រាកដនិយម និងអយុត្តិធម៌។

គួររំលឹកថា លោក Trump បានសន្យាថា នឹងមានការបង្រ្កាបជនអន្តោប្រវេសន៍ដ៏ធំ ដែលមានគោលបំណងនិរទេសជនអន្តោប្រវេសន៍ ក្នុងចំនួនដ៏ច្រើនបំផុតជាប្រវត្តិសាស្ត្រ ពោលគឺជាប្រតិបត្តិការដែលមិត្តរួមតំណែងរបស់លោក គឺលោក JD Vance បានប៉ាន់ប្រមាណថា អាចនាំមនុស្ស ១លាននាក់ក្នុងមួយឆ្នាំចេញពីប្រទេស។

ការអត្ថាធិប្បាយកាលពីថ្ងៃពុធ ដោយលោក Carlos Fernandez de Cossio បានកើតឡើងបន្ទាប់ពីមាននូវការពិភាក្សាជាប្រចាំអំពីជនអន្តោប្រវេសន៍ នៅទីក្រុង Havana ជាមួយសមភាគីនៃរដ្ឋបាលរបស់ប្រធានាធិបតីសហរដ្ឋអាមេរិក លោក Joe Biden។

លោកបានប្រាប់អ្នកសារព័ត៌មានថា រាល់សំណើនិរទេសបែបនេះ ត្រូវតែពិនិត្យនៅក្នុងរង្វង់ព្រំដែននៃកិច្ចព្រមព្រៀងអន្តោប្រវេសន៍ដែលមានស្រាប់ រវាងសហរដ្ឋអាមេរិក និងប្រទេសគុយបា។ លោក de Cossio បាននិយាយថា៖ «នៅក្នុងបរិបទនោះ វាមិនមានភាពប្រាកដនិយមនោះទេ ក្នុងការគិតថា អាចនឹងមានការនិរទេសដ៏ធំពីសហរដ្ឋអាមេរិកទៅកាន់ប្រទេសគុយបានោះ»។

គួរបញ្ជាក់ថា ក្រោមកិច្ចព្រមព្រៀងដែលមានស្រាប់ ប្រទេសគុយបាបានទទួលយកការនិរទេសមួយចំនួនតូចពីសហរដ្ឋអាមេរិកតាមផ្លូវអាកាស និងតាមផ្លូវសមុទ្រ អំឡុងរដ្ឋបាលរបស់លោក Biden៕