គេហទំព័រព័ត៌មាន Axios បានរាយការណ៍ដោយដកស្រង់សម្តីមន្ត្រីអ៊ីស្រាអែលថា អ៊ីស្រាអែលបានបញ្ជូនសំណើថ្មីមួយសម្រាប់កិច្ចព្រមព្រៀងមួយ ដើម្បីប្រកាសបទឈប់បាញ់ នៅតំបន់ហ្កាហ្សាស្ទ្រីប និងដោះលែងចំណាប់ថ្នូររបស់ខ្លួន ទៅឲ្យចលនាប៉ាឡេស្ទីនហាម៉ាស។ 

យោងតាមមន្ត្រីទាំងនោះបានឲ្យដឹងថា ក្របខ័ណ្ឌដែលបានធ្វើបច្ចុប្បន្នភាពសម្រាប់កិច្ចព្រមព្រៀង គឺមិនខុសគ្នាខ្លាំងពីសំណើដែលបានចរចាកាលពីខែសីហា ហើយមិនបានសម្រេចនោះ » ។ សំណើថ្មីនេះ ត្រូវបានបញ្ជូនទៅកាន់ក្រុមហាម៉ាស តាមរយៈប្រទេសអេហ្ស៊ីប ដែលឥឡូវនេះជាមធ្យោបាយដ៏សំខាន់សម្រាប់ការចរចា។

ក្រុមមន្ត្រីបានចង្អុលបង្ហាញថា៖«ក្រុមហាម៉ាស បានបង្ហាញឆន្ទៈកាន់តែច្រើន ក្នុងការបត់បែន និងចាប់   ផ្តើមអនុវត្តកិច្ចព្រមព្រៀងមួយែលបានព្រមព្រៀងគ្នា»។

សារព័ត៌មានរ៉យទ័រ បានរាយការណ៍មុននេះថា លោក Steven Witkoff ដែលជាបេសកជនពិសេសរបស់លោក ដូណាល់ ត្រាំ ប្រចាំតំបន់មជ្ឈិមបូព៌ា បានជួបជាមួយនាយករដ្ឋមន្ត្រីនៃប្រទេសកាតា និងអ៊ីស្រាអែល ដើម្បីចាប់ផ្តើមការជំរុញការទូតរបស់ប្រធានាធិបតីជាប់ឆ្នោតអាមេរិក ដើម្បីជួយឈានដល់បទឈប់បាញ់ហ្កាហ្សា និងកិច្ចព្រមព្រៀងដោះលែងចំណាប់ថ្នូរ មុនពេល លោក ចូលកាន់តំណែងនៅថ្ងៃទី ២០ ខែមករា»។