ប្រជាពលរដ្ឋមួយចំនួនដែលរងការជន់លិចធ្ងន់ធ្ងរ ដោយសារទឹកស្ទឹងព្រែកត្នោត បានជម្លៀសមកទីទួលសុវត្ថិភាព ដោយគ្រួសារមួយចំនួនកំពុងស្នាក់នៅបណ្ដោះអាសន្នលើ តាមដងផ្លូវទំនប់ ៧មករា ក្នុងខណ្ឌដង្កោ រាជធានីភ្នំពេញ។

នៅតាមបណ្ដោយផ្លូវ ទំនប់៧មករា ក្នុងទីតាំងសង្កាត់ សាក់សំពៅ ខណ្ឌដង្កោ នាថ្ងៃនេះ គឺមានការសាងសង់រោងបណ្ដោះអាសន្នជាច្រើន សម្រាប់ស្នាក់នៅ ក្រោយផ្ទះប្រជាពលរដ្ឋក្នុងតំបន់ទាំងនោះរងការជន់លិចធ្ងន់ធ្ងរ។ 

ប្រជាពលរដ្ឋ ដែលបានជម្លៀសមកស្នាក់នៅបណ្ដោះអាសន្ននៅទីតាំងនេះ គឺរស់នៅក្នុងសង្កាត់សាក់សំពៅ ហើយពួកគាត់មួយចំនួនបាន ជម្លៀសមកដោយខ្លួនជាច្រើនថ្ងៃមកហើយ រីឯគ្រួសារខ្លះ ទើបជម្លៀសដោយមានការជួយពីកងកម្លាំងកាលពីម្សិលម៉ិញ។

ចំពោះគ្រួសារមួយចំនួនបានទៅស្នាក់នៅជាមួយផ្ទះបងប្អូន រីឯគ្រសារមួយចំនួនត្រូវសាងសង់រោងបណ្ដោះអាសន្ននៅលើផ្លូវទំនប់៧មករាផ្ទាល់តែម្ដង។ ពួកគាត់លើកឡើងថា ទឹកឆ្នាំនេះធំនិងឡើងលឿនជាងឆ្នាំំមុន ហើយពួកគាត់ក៏សំណូមពរអោយកងកម្លាំងចុះមកជួយបន្ថែមដើម្បីដឹកជញ្ជូនទ្រព្យសម្បត្តិបន្ថែមផងដែរ។

តាមរបាយការណ៍របស់អាជ្ញាធរខណ្ឌដង្កោ កាលពីម្សិលម៉ិញ ទឹកជំនន់ស្ទឹងព្រែត្នោត បានជន់លិចផ្ទះប្រជាពលរដ្ឋចំនួនជាង២ពាន់ខ្នងហើយ ស្ថិតសង្កាត់ ក្នុងនោះក៏មានសាលារៀនចំនួន៣៥ខ្នង ផ្លូវចំនួន០៣កន្លែង និងផ្ទៃដីកសិកម្មជាង១៥២ហិកតាផងដែរ។

 ករណីទឹកស្ទឹងព្រែកត្នោតនេះ មន្ទីរសាធារណការ និងដឹកជញ្ជូនរាជធានីភ្នំពេញ កាលពីយប់ម៉ិញ បានបញ្ជាក់ពីការប្រកាសអាសន្ន ដោយបញ្ជាក់អោយប្រជាពលរដ្ឋ រស់នៅក្នុងសង្កាត់ គងនយ សង្កាត់ទៀន ស្ពានថ្ម ព្រែកកំពឹស និងសង្កាត់រលួសត្រូវជម្លៀសទៅទីទួលសុវត្ថិភាពជាបន្ទាន់៕

អត្ថបទ៖ គឹមហុក