ក្រុមស្ម័គ្រចិត្តសុខភាពនៅប្រទេសម៉ាឡេស៊ី បានត្រៀមខ្លួនសម្រាប់ការហក់ឡើងខ្ពស់ករណីជំងឺឆ្លង បន្ទាប់ពីទឹកជំនន់បំផ្លិចបំផ្លាញ ដែលមើលឃើញមនុស្សរាប់ម៉ឺននាក់ បានជម្លៀសខ្លួន ក្នុងនោះក្តីកង្វល់នៅកើតមានក្នុងប្រទេសមួយនេះថា ភ្លៀងឥតឈប់ឈរច្រើនថ្ងៃទៀត នឹងកើតមានឡើង ។

ទឹកជំនន់ បានចាប់ផ្តើមស្រកនៅរដ្ឋរងផលប៉ះពាល់ខ្លាំងបំផុត Kelantan ស្ថិតនៅតាមតំបន់ឆ្នេរភាគឦសានប្រទេសម៉ាឡេស៊ី ប៉ុន្តែទិន្នន័យពីរដ្ឋាភិបាល បង្ហាញថា មនុស្សជាង ៤ម៉ឺននាក់ បន្តស្នាក់នៅតាមទីជម្រកបណ្តោះអាសន្ន ស្របពេលមានការព្រួយបារម្ភពីរលកទី ២ដ៏មានសក្តានុពលនៃទឹកជំនន់ក្នុងសប្តាហ៍នេះ ។

វីដេអូក្មេងៗលេងក្នុងទឹកភក់ បានសាយភាយនៅលើអនឡាញក្នុងរយៈពេលប៉ុន្មានថ្ងៃកន្លងមនេះ ធ្វើឲ្យមានក្តីកង្វល់ចំពោះការរីករាលដាលខ្លាំងនៃជំងឺឆ្លង ដូចជាជំងឺអាសន្នរោគជាដើម ។

ទីភ្នាក់ងារព័ត៌មានរដ្ឋ Bernama រាយការណ៍ដោយលើកឡើងពីប្រភពក្រុមអាជ្ញាធរសុខភាពរដ្ឋថា ជំងឺឆ្លងជិត ៥ពាន់ករណី រួមទាំងជំងឺគ្រុនពោះវៀន ជំងឺផ្លូវដង្ហើម និងជំងឺសើរស្បែក មកទល់នឹងពេលនេះ ត្រូវបានរកឃើញនៅក្នុងមជ្ឈមណ្ឌលជួយសង្រ្គោះរដ្ឋ Kelantan ។

សមាគមសង្គ្រោះវេជ្ជសាស្រ្តម៉ាឡេស៊ី និយាយថា ចំនួនករណីរាយការណ៍ អាចគ្រប់គ្រងបាន ប៉ុន្តែក្រុមស្ម័គ្រចិត្តស្ថិតក្រោមការប្រុងប្រយ័ត្ន សម្រាប់ការហក់ឡើងខ្ពស់ករណីឆ្លងនាពេលអនាគត ។

ក្រសួងឧតុនិយមម៉ាឡេស៊ី បាននិយាយកាលពីថ្ងៃពុធថា ពួកគេរំពឹងថា ភ្លៀងមូសុងវស្សា កើតមានចាប់ពីថ្ងៃទី ៨ រហូតដល់ថ្ងៃទី ១៤ ខែធ្នូ ដែលអាចនាំមកនូវភ្លៀងធ្លាក់ឥតឈប់ឈរនៅតំបន់ឆ្នេរភាគខាងកើតឧបទ្វីបម៉ាឡេស៊ី និងតំបន់ជាច្រើនទៀតក្នុងរដ្ឋ Sabah និងរដ្ឋ Sarawak ស្ថិតនៅលើកោះ Borneo ៕