ប្រធានាធិបតីជាប់ឆ្នោត លោក Donald Trump បាន «បាត់បង់ជំនឿ» លើសមាគមកាំភ្លើងជាតិ (NRA) ហើយ។ នេះបើយោងតាមមន្ត្រីជាន់ខ្ពស់នៃស្ថាប័នពាក់ព័ន្ធនឹងកាំភ្លើង ដែលបានលើកឡើងនៅក្នុងលិខិតថ្មីមួយច្បាប់ទៅកាន់សមាជិកក្រុមប្រឹក្សាភិបាល ដែលថា NRA ត្រូវកែទម្រង់ឡើងវិញ ដើម្បីឲ្យខ្លួនអាចជួយការពារសិទ្ធិអំណាចថ្មីរបស់គណបក្សសាធារណរដ្ឋ នៅសភា អំឡុងការបោះឆ្នោតពាក់កណ្តាលអាណត្តិឆ្នាំ២០២៦។

លោក Bill Bachenberg ដែលជាអនុប្រធានទី១ របស់ក្រុមនេះ និងជាសម្ព័ន្ធមិត្តដ៏រឹងមាំរបស់លោក Trump ក៏បានប្រាប់សមាជិកក្រុមប្រឹក្សាភិបាលដែរថា អំឡុងការបោះឆ្នោតឆ្នាំនេះ លោក Trump មានការខកចិត្ត ដែល NRA មិនបានប្តេជ្ញាចិត្តធ្វើការងារបន្ថែមទៀត ដើម្បីជួយលោកឲ្យឈ្នះ។ ហើយលោក Bachenberg បានសរសេរថា ក្នុងអំឡុងសន្និសីទប្រចាំឆ្នាំរបស់ក្រុម នៅក្នុងខែឧសភា លោក Trump បានបង្ហាញពីការភ្ញាក់ផ្អើលដែល NRA បានចំណាយប្រាក់រាប់សិបលានដុល្លារមួយឆ្នាំៗឲ្យដល់មេធាវី លោក William A. Brewer III ដែលវិភាគទានផ្នែកនយោបាយ បានគាំទ្រគណបក្សប្រជាធិបតេយ្យរយៈពេលជាច្រើនឆ្នាំ។

នៅក្នុងលិខិតកាលពីសប្តាហ៍មុនរបស់លោកដែលត្រូវបានចុះហត្ថលេខាដោយលោក Mark Vaughan អនុប្រធានទី២ នៃក្រុមប្រឹក្សាភិបាល NRA លោក Bachenberg បានសរសេរថា៖ «ខ្ញុំអាចនិយាយបានថា លោកប្រធានាធិបតី Trump និងមជ្ឈដ្ឋានខាងក្នុងបំផុតរបស់លោក បានបាត់បង់ជំនឿលើ NRA ហើយ។ ខ្ញុំទាក់ទងជាមួយពួកគេជាញឹកញាប់។ យើងមានការងារច្រើនស្អេកស្កះ ដើម្បីធ្វើឲ្យពួកគេមានទំនុកចិត្តលើយើងឡើងវិញ មិនខុសគ្នាដែរ សមាជិក និងម្ចាស់ជំនួយរបស់យើង»៕