​ស៊ូដង់៖ ក្រុមបាតុករ​នៅតែ​បន្ត​ការតវ៉ា​របស់ខ្លួន​នៅតាម​ដងផ្លូវ​នានា​ក្នុងប្រទេស​ស៊ូដង់ បន្ទាប់ពី​កងកម្លាំងប្រដាប់អាវុធ​របស់​ប្រទេស​នេះ​បានធ្វើ​រដ្ឋប្រហារ​យោធា​។​ ខណៈ​កំពុង​ស្រែក​ស្រុះៗ​គ្នា និង​គ្រវីទង់ជាតិ ពួកគេ​បាន​បិទផ្លូវ​ក្នុង​រដ្ឋធានី Khartoum និង​ជុំវិញ​ប្រទេស​បន្ទាប់ពី​ការដណ្ដើម​កាន់កាប់​។​

​តាម​ការចុះផ្សាយ​របស់​សារព័ត៌មាន FRANCE 24 នាយករដ្ឋមន្ត្រី​ស៊ូដង់ Abdalla Hamdok បាន​ត្រលប់មក​ផ្ទះ​វិញ​ហើយ​កាលពី​ថ្ងៃ​អង្គារ ​មួយថ្ងៃ​បន្ទាប់ពី​លោក​ត្រូវបាន​ចាប់ឃុំខ្លួន ខណៈដែល​កងទ័ព​បាន​ដណ្តើម​អំណាច​នៅក្នុង​រដ្ឋប្រហារ​ ដែល​បាន​ឆក់យក​ជីវិត​មនុស្ស​យ៉ាងហោចណាស់​ ១០​នាក់​ដោយសារ​ការបាញ់​រះ​របស់​យោធា​លើ​ហ្វូងមនុស្ស។​ យោងតាម​ទីភ្នាក់ងារ​ព័ត៌មាន Reuters លោក​ឧ​ត្ត​ម​សេនីយ៍​យោធា​ស៊ូដង់ Abdel-Fattah Burhan ​បាន​និយាយថា រដ្ឋប្រហារ​កាលពី​ថ្ងៃ​ចន្ទ​គឺ​សម​ហេតុផល​ក្នុងការ​បញ្ចៀស "​សង្គ្រាមស៊ីវិល​" ហើយ​ថា ​នាយករដ្ឋមន្ត្រី​ដែល​ត្រូវបាន​ឃុំខ្លួន​នោះ​ត្រូវ​ត្រឡប់ទៅផ្ទះ​របស់លោក​វិញ​នៅ​ថ្ងៃ​អង្គារ​។ មុននេះលោក​បាន​ព្យាយាម​បង្ហាញ​អំពី​ភាពត្រឹមត្រូវ​នៃ​ការកាន់កាប់ ​ដោយ​ដាក់​ការស្ដីបន្ទោស​លើ​បញ្ហា​ជម្លោះ​ផ្នែក​នយោបាយ​។​ ​រដ្ឋប្រហារ​បាន​នាំ​ឲ្យ​មានការ​ថ្កោលទោស​ទូទាំង​ពិភពលោក​។ ក្រុម​អ្នកការទូត​បាន​ប្រាប់​ទីភ្នាក់ងារសារព័ត៌មាន AFP ថា ​ក្រុមប្រឹក្សាសន្តិសុខ​អង្គការសហប្រជាជាតិ​គ្រោង​ជួបគ្នា​កាលពី​ថ្ងៃ​អង្គារ ​ដើម្បី​ពិភាក្សា​អំពី​វិបត្តិ​នេះ​៕

អត្ថបទ៖ សុខមាន