រដ្ឋមន្ត្រីការបរទេសរុស្ស៊ី លោក Sergei Lavrov និងរដ្ឋមន្ត្រីការបរទេសអាមេរិក លោក Antony Blinken អាចនឹងប្រឈមមុខគ្នា ជុំវិញបញ្ហាសង្គ្រាម នៅប្រទេសអ៊ុយក្រែន នាថ្ងៃព្រហស្បតិ៍ (ទី៥ ខែធ្នូ) នេះ នៅក្នុងកិច្ចប្រជុំប្រចាំឆ្នាំរបស់អង្គការសន្តិសុខ និងសហប្រតិបត្តិការ នៅអឺរ៉ុប (OSCE) ក្នុងប្រទេសម៉ាល់តា។

អ៊ុយក្រែននឹងក្លាយជាបញ្ហានយោបាយដ៏លេចធ្លោ នៅក្នុងកិច្ចប្រជុំដែលនឹងត្រូវអនុម័តជាផ្លូវការនូវកិច្ចព្រមព្រៀងចុងក្រោយដែលសម្រេចបាន ស្ដីពីបញ្ហានានា ក្នុងនោះរួមទាំងមុខតំណែងបុគ្គលិកជាន់ខ្ពស់ នៅស្ថាប័នសន្តិសុខ និងសិទ្ធិ ជាកន្លែងដែលមហាអំណាចលោកខាងលិច តែងតែចោទប្រកាន់រុស្ស៊ីថា បានបំពានសិទ្ធិមនុស្ស និងបទដ្ឋានអន្តរជាតិផ្សេងទៀត។

ហើយនេះជាការធ្វើដំណើរលើកដំបូងរបស់លោក Lavrov ទៅកាន់រដ្ឋសមាជិករបស់សហភាពអឺរ៉ុប (EU) គិតចាប់តាំងពីរុស្ស៊ីបានចាប់ផ្តើមលុកលុយពេញលេញលើអ៊ុយក្រែន ក្នុងខែកុម្ភៈ ឆ្នាំ២០២២។

គួរបញ្ជាក់ថា លោក Lavrov និងលោក Blinken ដែលអាណត្តិរបស់លោក នឹងបញ្ចប់នៅខែក្រោយនោះ មិនមានគម្រោងជួបប្រជុំគ្នានោះទេ។ គិតចាប់តាំងពីសង្គ្រាមរបស់រុស្ស៊ី នៅអ៊ុយក្រែន បានចាប់ផ្តើម ឥស្សរជនទាំង២ បានចូលរួមការប្រជុំលក្ខណៈអន្តរជាតិម្ដងម្កាលជាមួយគ្នា ប៉ុន្តែទំនាក់ទំនងរបស់ពួកគេ មានកម្រិត។

កាលពីខែមីនា ឆ្នាំ២០២៣ នៅខាងក្រៅកិច្ចប្រជុំក្រុមប្រទេសទាំង២០ (G20) នៅទីក្រុងញូវដេលី ប្រទេសឥណ្ឌា អ្នកទាំង២ បានជួបប្រជុំគ្នាដោយមិនបានគ្រោងទុក ដែលក្រសួងការបរទេសរុស្ស៊ី បាននិយាយថា មានរយៈពេលតិចជាង ១០នាទី៕