ក្រុមអាជ្ញាធរក្នុងស្រុក និយាយនៅថ្ងៃព្រហស្បតិ៍នេះថា កម្មករ ១៣នាក់ កំពុងបាត់ខ្លួន បន្ទាប់ពីការបាក់ដីភ្លាមៗនៅការដ្ឋានសាងសង់ផ្លូវរថភ្លើង ស្ថិតក្នុងទីក្រុង Shenzhen នៅភាគខាងត្បូងខេត្ត Guangdong ប្រទេសចិន ។

យោងតាមការអះអាងរបស់មន្ទីគ្រប់គ្រងគ្រោះសង្រ្គោះបន្ទាន់ស្រុក Bao'an បានឲ្យដឹងថា ការបាក់ដីនេះ បានកើតឡើងកាលពីវេលាម៉ោង ១១យប់ ម៉ោងក្នុងស្រុក ថ្ងៃពុធ នៅការដ្ឋានសាងសង់ផ្លូវរថភ្លើង Shenzhen-Jiangmen និងបង្ខំឲ្យមានប្រតិបត្តិការជួយសង្រ្គោះទ្រង់ទ្រាយធំ ដើម្បីស្វែងរកមនុស្សបាត់ខ្លួន ។

ជាការឆ្លើយតបនឹងស្ថានភាពដ៏អាក្រក់នេះ ក្រុមអ្នកស្រុករស់នៅក្បែរនោះ បានបង្ខំចិត្តជម្លៀសខ្លួនចេញ ខណៈការរឹតត្បិតចរាចរណ៍ ត្រូវបានអនុវត្តបណ្តោះអាសន្ននៅជុំវិញតំបន់រងផលប៉ះពាល់ ដើម្បីសម្រួលដល់ការងារជួយសង្រ្គោះបន្ទាន់ ។

ក្រុមមន្រ្តីខេត្ត Guangdong បញ្ជាក់ថា ការស៊ើបអង្កេតគ្រប់ជ្រុងជ្រោយចំពោះមូលហេតុនាំឲ្យឧបទ្ទេហេតុដ៏អាក្រក់នេះកើតឡើង បច្ចុប្បន្នកំពុងធ្វើឡើង ។

ស្របពេលដែលក្រុមការងារសង្រ្គោះ បន្តប្រតិបត្តិការរុករកដោយគ្មាននឿយហត់របស់ពួកគេ ក្តីកង្វល់បានកើតមានចំពោះជោគវាសនារបស់កម្មករបាត់ខ្លួន ៕