ប្រទេសជប៉ុន នៅថ្ងៃព្រហស្បតិ៍ (ទី៥ ខែធ្នូ) នេះ បានផ្តល់ជំនួយដល់ហ្វីលីពីនចំនួន ១,៦ពាន់លានយ៉េន (១០,៦លានដុល្លារ) ក្នុងគោលបំណងឲ្យប្រទេសនេះលើកកម្ពស់សមត្ថភាពកងទ័ពជើងទឹករបស់ខ្លួន ដោយជំនួយនេះកើតមានឡើងមួយថ្ងៃបន្ទាប់ពីទីក្រុងម៉ានីល បាននិយាយថា ឆ្មាំល្បាតឆ្នេររបស់ចិន បាន «បង្កបញ្ហារំខាន» ដល់នាវារដ្ឋាភិបាលរបស់ខ្លួន។

ភាគីទាំង២ បានឲ្យដឹងថា មូលនិធិដែលជាផ្នែកមួយនៃកម្មវិធីជំនួយសន្តិសុខ ក្នុងតំបន់របស់ជប៉ុននេះ នឹងផ្តល់ដល់កងទ័ពជើងទឹកហ្វីលីពីននូវទូកពោងដែលគ្រោងដ៏រឹងមាំ ប្រព័ន្ធរ៉ាដាតាមឆ្នេរ និងប្រព័ន្ធកំណត់អត្តសញ្ញាណ ដោយស្វ័យប្រវត្តិ។

បន្ទាប់ពីមានកិច្ចប្រជុំ រវាងឯកអគ្គរដ្ឋទូតជប៉ុន លោក Kazuya Endo និងរដ្ឋមន្ត្រីការបរទេសហ្វីលីពីន លោក Enrique Manalo ស្ថានទូតជប៉ុន បានឲ្យដឹងថា កញ្ចប់ជំនួយនេះនឹង «រួមចំណែកដល់ការរក្សា និងពង្រឹងសន្តិសុខ ក្នុងតំបន់» ព្រមទាំងលើកកម្ពស់សន្តិសុខនៃផ្លូវសមុទ្រសំខាន់ៗផងដែរ»។

គួរបញ្ជាក់ថា ចំនួនទឹកប្រាក់ដែលត្រូវបានប្រកាសនៅថ្ងៃព្រហស្បតិ៍នេះ បានកើនឡើងទ្វេដងនៃចំនួន ៦០០លានយ៉េនដែលទីក្រុងម៉ានីលទទួលបាននៅពេលដែលកម្មវិធីជំនួយសន្តិសុខផ្លូវការ (OSA) បានចាប់ផ្តើម នៅឆ្នាំ២០២៣។

ប្រទេសហ្វីលីពីន បាន និងកំពុងធ្វើឲ្យប្រសើរឡើងនូវធនធានសន្តិសុខដែនសមុទ្ររបស់ខ្លួន ហើយលើកកម្ពស់ទំនាក់ទំនងជាមួយសម្ព័ន្ធមិត្ត ដើម្បីទប់ទល់នឹងការអះអាងដោយឥតញញើតរបស់ទីក្រុងប៉េកាំង ចំពោះការទាមទាររបស់ខ្លួន នៅក្នុងសមុទ្រចិនខាងត្បូង ក្នុងនោះរួមទាំងតំបន់មានជម្លោះ រវាងប្រទេសជិតខាងទាំង២ ផងដែរ៕