រដ្ឋមន្ត្រីការបរទេសហូឡង់ នៅថ្ងៃព្រហស្បតិ៍ (ទី៥ ខែធ្នូ) នេះ បាននិយាយថា ប្រទេសហូឡង់នឹងស្នើឲ្យសហភាពអឺរ៉ុប (EU) ផ្អាកកិច្ចព្រមព្រៀងលើកលែងទិដ្ឋាការជាមួយប្រទេសហ្សកហ្ស៊ី បន្ទាប់ពីមនុស្សជាង ៣០០នាក់ ត្រូវបានចាប់ខ្លួនអំឡុងបាតុកម្មគាំទ្រ EU នៅក្នុងប្រទេសនៃតំបន់កូកាសខាងត្បូងមួយនេះ។

គួរបញ្ជាក់ថា ក្រុមបាតុករនៅហ្សកហ្ស៊ីអស់រយៈពេលមួយសប្តាហ៍កន្លងមកនេះ បានធ្វើការតវ៉ាប្រឆាំងនឹងការសម្រេចរបស់រដ្ឋាភិបាល ក្នុងការបញ្ឈប់ការចរចា ស្តីពីការចូលជាសមាជិករបស់ EU។

ហើយនៅមុនកិច្ចប្រជុំរយៈពេល ២ថ្ងៃរបស់រដ្ឋមន្ត្រីការបរទេសនៃអង្គការសន្តិសុខ និងសហប្រតិបត្តិការ នៅអឺរ៉ុប (OSCE) ក្នុងប្រទេសម៉ាល់តា រដ្ឋមន្ត្រីការបរទេសហូឡង់ Caspar Veldkamp បាននិយាយទៅកាន់អ្នកសារព័ត៌មានថា លោកនឹងធ្វើសំណើផ្លូវការមួយទៅកាន់ EU «ដើម្បីបញ្ជាក់ឲ្យបានច្បាស់លាស់ដល់រដ្ឋាភិបាលហ្សកហ្ស៊ីថា ផ្លូវដែលពួកគេកំពុងជ្រើសរើស ត្រូវទទួលផលតបស្នងវិញយ៉ាងស័ក្ដិសម»។

គួរដឹងថា បច្ចុប្បន្ននេះ ជនជាតិហ្សកហ្ស៊ីអាចធ្វើដំណើរទៅកាន់សហភាពអឺរ៉ុប សម្រាប់ការដើរលេងកម្សាន្តរយៈពេលខ្លី ដោយមិនចាំបាច់សុំទិដ្ឋាការនោះឡើយ៕