ទូរទស្សន៍រដ្ឋ CCTV នៅថ្ងៃព្រហស្បតិ៍ (ទី៥ ខែធ្នូ) នេះ បានរាយការណ៍ថា ប្រធានាធិបតីចិនលោក ស៊ី ចិនពីង (Xi Jinping) បានសង្កត់ធ្ងន់លើតម្រូវការ ក្នុងការពង្រឹងវិន័យ និងប្រយុទ្ធប្រឆាំងនឹងអំពើពុករលួយ ក្នុងវិស័យយោធា ក៏ដូចជាលើកកម្ពស់សមត្ថភាពសង្គ្រាមព័ត៌មានផងដែរ។

ចាប់តាំងពីឆ្នាំមុនមក យោធារបស់ប្រទេសចិន បានឆ្លងកាត់ការបោសសម្អាតប្រឆាំងអំពើពុករលួយយ៉ាងទូលំទូឡាយ ដោយមានឧត្តមសេនីយ៍របស់កងទ័ពរំដោះប្រជាជនចិន (PLA) យ៉ាងហោចណាស់ ៩រូប និងនាយកប្រតិបត្តិឧស្សាហកម្មការពារជាតិមួយចំនួនតូចត្រូវបានដកចេញពីស្ថាប័ននីតិប្បញ្ញត្តិជាតិ។

លោក ស៊ី បានថ្លែងថា៖ «ចាំបាច់ត្រូវអនុវត្តវិន័យយ៉ាងតឹងរ៉ឹង និងបង្ក្រាបអំពើពុករលួយ ដើម្បីធានាបានថា យោធានៅតែមានភាពស្មោះត្រង់ បរិសុទ្ធ និងគួរឲ្យទុកចិត្តបានយ៉ាងពិតប្រាកដ»។

គួរបញ្ជាក់ថា ការកត់សម្គាល់របស់មេដឹកនាំចិនបែបនេះ បានកើតមានឡើងបន្ទាប់ពីក្រសួងការពារជាតិ បាននិយាយកាលពីសប្តាហ៍មុនថា មន្ត្រីយោធាជាន់ខ្ពស់មួយរូបត្រូវបានព្យួរតួនាទី ហើយកំពុងស្ថិតនៅក្រោមការស៊ើបអង្កេត ពាក់ព័ន្ធនឹង «ការរំលោភវិន័យធ្ងន់ធ្ងរ»។

ជាមួយគ្នានេះ លោក ស៊ី កំពុងធ្វើអធិការកិច្ចដំបូងរបស់លោក ចំពោះនាយកដ្ឋានសង្គ្រាមព័ត៌មានថ្មីរបស់យោធាដែលត្រូវបានបង្កើតឡើង កាលពីខែមេសា ដែលត្រូវរាយការណ៍ដោយផ្ទាល់ទៅគណៈកម្មការយោធាមជ្ឈិមដ៏មានឥទ្ធិពល។

ជាផ្នែកនៃការរៀបចំឡើងវិញដ៏ធំបំផុតនៃកងកម្លាំងប្រដាប់អាវុធរបស់ប្រទេសចិន ចាប់តាំងពីឆ្នាំ២០១៥ អង្គភាពថ្មីនេះ ចង្អុលបង្ហាញពីការបង្កើនការយកចិត្តទុកដាក់របស់ថ្នាក់ដឹកនាំបក្សកុម្មុយនីស្តដែលកំពុងកាន់អំណាច ជុំវិញការធ្វើទំនើបកម្មយោធា និងទម្រង់នៃសង្រ្គាមមិនធម្មតា។

បើយោងតាមសេចក្ដីរាយការណ៍របស់ទូរទស្សន៍ CCTV បានឲ្យដឹងថា លោក ស៊ី បានប្រាប់មន្រ្តីថា៖ «ស្ថានភាព និងតួនាទីនៃបណ្ដាញប្រព័ន្ធព័ត៌មាន នៅក្នុងសង្គ្រាមសម័យទំនើប គឺមានភាពលេចធ្លោ ក្នុងកម្រិតដែលមិនធ្លាប់មានពីមុនមក»។ លោកបានបន្ថែមថា កងកម្លាំងគាំទ្រព័ត៌មានកងទ័ពរំដោះប្រជាជន ដូចដែលអង្គភាពថ្មីត្រូវបានស្គាល់ គឺជា «កម្លាំងប្រយុទ្ធ» ដំបូងគេ និងសំខាន់បំផុត៕