រដ្ឋមន្ត្រីការបរទេសរុស្ស៊ី លោក Sergey Lavrov បានប៉ះទង្គិចពាក្យសម្ដីគ្នាដោយប្រយោលជាមួយរដ្ឋមន្ត្រីការបរទេសអាមេរិក លោក Antony Blinken កាលពីថ្ងៃព្រហស្បតិ៍សប្ដាហ៍ ក្នុងកិច្ចប្រជុំសន្តិសុខប្រចាំឆ្នាំ ដោយចោទប្រកាន់លោកខាងលិចថាបានព្យាយាមដុតបញ្ឆេះជម្លោះនៅអ៊ុយក្រែន ប៉ុន្តែបានដើរចេញ មុនពេលលោក Blinken និងក្រុមវាគ្មិនផ្សេងទៀតអាចឆ្លើយតបបាន។

ថ្លែងនៅក្នុងកិច្ចប្រជុំថ្នាក់រដ្ឋមន្ត្រីរបស់អង្គការសន្តិសុខ និងសហប្រតិបត្តិការនៅអឺរ៉ុប នៅប្រទេសម៉ាល់តា លោក Lavrov បានចោទប្រកាន់លោកខាងលិចថាបានធ្វើឱ្យសង្រ្គាមត្រជាក់រស់ឡើងវិញ និងបង្កជម្លោះដោយផ្ទាល់ជាមួយរុស្ស៊ី។

លោក Lavrov បាននិយាយក្នុងអំឡុងពេលឈប់សំចតដំបូងរបស់លោកនៅក្នុងប្រទេសសហភាពអឺរ៉ុបចាប់តាំងពីការឈ្លានពានពេញបន្ទុករបស់រុស្ស៊ីលើអ៊ុយក្រែនកាលពីថ្ងៃទី២៤ ខែកុម្ភៈឆ្នាំ ២០២២ ថា សកម្មភាពរបស់សហរដ្ឋអាមេរិកត្រូវបានជំរុញដោយបំណងប្រាថ្នាមួយដើម្បី រុញអង្គការ NATO ត្រឡប់ទៅរកចំណុចក្ដៅខាងនយោបាយ ។ ដោយសារការចាប់បដិសន្ធិឡើងវិញនៃសង្រ្គាមត្រជាក់ ឥឡូវនេះគេបានមើលឃើញហានិភ័យកាន់តែខ្លាំងនៃការកើនឡើងរបស់សង្រ្គាមនោះ ចូលទៅក្នុងដំណាក់កាលក្តៅ ។

លោក Blinken ដែលបាននិយាយបន្ទាប់ពីលោក Lavrov ចេញពីបន្ទប់នោះ បានដាក់ការស្តីបន្ទោសចំពោះការកើនឡើងនៅក្នុងតំបន់បកទៅលើប្រទេសរុស្ស៊ីវិញ ដោយកត់សម្គាល់ថា រដ្ឋមន្ត្រីការបរទេសរុស្ស៊ី មិនព្រមនៅស្តាប់វាគ្មិនផ្សេងទៀត។

ប្រមុខការទូតអាមេរិករូបនេះ បាននិយាយថា យើងសូមនិយាយអំពីការកើនឡើង សំដៅដល់ការលើកឡើងពីការដាក់ពង្រាយកងកម្លាំងកូរ៉េខាងជើងនៅក្នុងទ្វីបអឺរ៉ុប ការប្រើប្រាស់មីស៊ីលផ្លោងរយៈចម្ងាយមធ្យមដើម្បីវាយប្រហារអ៊ុយក្រែន ចំណាត់ការរបស់រុស្ស៊ីក្នុងការកាត់បន្ថយកម្រិតនៃការប្រើប្រាស់អាវុធនុយក្លេអ៊ែរ និងការវាយប្រហារលើ ហេដ្ឋារចនាសម្ព័ន្ធថាមពលអ៊ុយក្រែន៕