រដ្ឋមន្ត្រីក្រសួងសុខាភិបាលសាធារណៈ លោក Roger Kamba បាននិយាយកាលពីថ្ងៃព្រហស្បតិ៍ថា សាធារណរដ្ឋប្រជាធិបតេយ្យកុងហ្គោ (DRC) កំពុងស្ថិតលើ «ការព្រមានខ្ពស់» ជុំវិញការលេចចេញនូវជំងឺពុំទាន់កំណត់អត្តសញ្ញាណបាន ដែលបានបណ្តាលឲ្យមនុស្សជាង៧០នាក់ស្លាប់។

យោងតាមមជ្ឈមណ្ឌលគ្រប់គ្រង និងបង្ការជំងឺនៅអាហ្វ្រិក (Africa CDC)បានឲ្យដឹងថា លទ្ធផលតេស្តដើម្បីបញ្ជាក់ពីលក្ខណៈនៃជំងឺនេះ ត្រូវបានគេរំពឹងទុកនៅថ្ងៃសុក្រ ឬថ្ងៃសៅរ៍ស្អែកនេះ ។

លោក Kamba បាននិយាយនៅក្នុងសន្និសីទសារព័ត៌មានថា ជំងឺនេះ «ពុំទាន់ដឹងពីប្រភពដើមនៅឡើយ» ដែលត្រូវបានរាយការណ៍នៅក្នុងតំបន់ Panzi នៃខេត្ត Kwango ភាគនិរតី ដែលបានធ្វើឲ្យប៉ះពាល់ដល់មនុស្ស៣៨២នាក់ចាប់តាំងពីខែតុលា។ លោករដ្ឋមន្ត្រី បាននិយាយថា អ្នកដែលទទួលរងផលប៉ះពាល់ បានបង្ហាញរោគសញ្ញា «ស្រដៀងទៅនឹងជំងឺផ្ដាសាយ» ហើយប្រហែល ៤០ ភាគរយនៃករណីជំងឺនេះ ពាក់ព័ន្ធនឹងកុមារ។

លោក Kamba និយាយថា ៦១ភាគរយនៃកុមារនៅក្នុងខេត្ត Kwango បានទទួលរងពីកង្វះអាហារូបត្ថម្ភរួចហើយ ដែលអាចធ្វើអោយផលប៉ះពាល់នៃជំងឺនេះកាន់តែធ្ងន់ធ្ងរ។

លោកនិយាយថា រហូតមកដល់ពេលនេះ មានអ្នកស្លាប់ចំនួន ៧១ នាក់ ត្រូវបានរាយការណ៍ ហើយ ២៧នាក់ក្នុងចំណោមអ្នកស្លាប់ស្ថិតនៅមណ្ឌលសុខភាព និង ៤៤ នាក់ផ្សេងទៀតនៅក្នុងសហគមន៍មូលដ្ឋាន។ លោកបាននិយាយបន្ថែមថា មនុស្សប្រហែល ៣០០ នាក់ បានជាសះស្បើយឡើងវិញ។