អង្គការមនុស្សធម៌របស់អង្គការសហប្រជាជាតិ បាននិយាយកាលពីថ្ងៃព្រហស្បតិ៍ថា ការបាញ់ផ្លោងទៅលើជំរំជនភៀសខ្លួន Zamzam ដែលរងគ្រោះទុរ្ភិក្ស នៅភាគខាងលិចប្រទេសស៊ូដង់ បានបង្ខំឱ្យជនស៊ីវិលរាប់ពាន់នាក់ភៀសខ្លួនចេញ។ ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា ខ្លួនបានទទួលរបាយការណ៍នៃការបន្តបាញ់ផ្លោង និងអសន្តិសុខ នៅក្នុងជំរំសម្រាប់ជនភៀសខ្លួនក្នុងប្រទេស។

ជំរំ Zamzam ដែលមានចម្ងាយប្រហែល១២គីឡូម៉ែត្រ ភាគខាងត្បូងទីក្រុង El Fasher រដ្ឋធានីនៃរដ្ឋ North Darfur គឺជាជំរំជនភៀសខ្លួនខាងក្នុងប្រទេសធំបំផុតមួយ។ យោងតាមអង្គការសហប្រជាជាតិ បានឲ្យដឹងថា ជំរំនេះអាចដាក់មនុស្សជិត៥០០.០០០នាក់ ដោយសារតែមានការប៉ះទង្គិចគ្នានៅបន្តនៅទីក្រុង El Fasher ។

អង្គការ OCHA បាននិយាយថា អង្គការទេសន្តប្រវេសន៍អន្តរជាតិ បានរាយការណ៍ថា កាលពីថ្ងៃពុធ មនុស្សជាង២.១០០នាក់ បានចាកចេញពីជំរំ Zamzam ក្រោមការបាញ់ផ្លោង ភាគច្រើននៅទីក្រុង El Fasher និងទីក្រុង Dar as Salam ក្នុងរដ្ឋ North Darfur ។

កម្មវិធីស្បៀងអាហារពិភពលោក (WFP) បានព្រមានថា ការវាយប្រហារណាមួយលើជំរំ Zamzam អាចពន្យារការទៅដល់នៃក្បួនរថយន្តដឹកជំនួយខណៈធ្វើដំណើរទៅកាន់ជំរំនោះ ជាកន្លែងតែមួយគត់នៅលើពិភពលោកដែលភាពអត់ឃ្លាន ត្រូវបានបញ្ជាក់។

កាលពីពេលថ្មីៗនេះ កម្មវិធីស្បៀងអាហារពិភពលោក បានដឹកជញ្ជូនការផ្គត់ផ្គង់ស្បៀងអាហារសំខាន់ៗទៅកាន់ជំរំ Zamzam កាត់តាមច្រកឆ្លងកាត់ព្រំដែន Adre ជាមួយប្រទេសឆាដ ហើយស្បៀងអាហារទាំងអស់ត្រូវបានចែកចាយដល់គ្រួសារជាច្រើន។