ឧត្តរមានជ័យ៖ នារសៀលថ្ងៃទី៥ធ្នូឆ្នាំ២០២៤ម្សិលមិញនេះ ឯកឧត្តម មាន ចាន់យ៉ាដាអភិបាល នៃគណៈអភិបាលខេត្តឧត្តរមានជ័យ អញ្ជើញជួបសំណេះសំណាល និងជូនដំណើរយោធិន នៃកងរាជអាវុធហត្ថ ទើបជ្រើសរើសថ្មី (ជាប់ជាស្ថាពរ) ចូលហ្វឹកហ្វឺន នៅមជ្ឈមណ្ឌលហ្វឹកហ្វឺន កងរាជអាវុធហត្ថ (ភ្នំជុំសែនរីករាយ) ខេត្តកំពង់ឆ្នាំង ។

ពិធីនេះក៏មានការអញ្ជើញចូលចូលពីសំណាក់ មេបញ្ជាការ មេបញ្ជាការរង ប្រធានមន្ទីរអង្គភាព​ពាក់ព័ន្ធ នាយទាហាន នាយទាហានរង នៃកងរាជអាវុធហត្ថខេត្ត ប្អូនៗយោធិន នៃកងរាជអាវុធហត្ថ​ទើបជ្រើសរើសថ្មី មាតាបិតា និងអាណាព្យាបាល ជាច្រើនរូបទៀត។

ក្នុងឱកាសនោះឯកឧត្តម មាន ចាន់យ៉ាដា អភិបាលខេត្តឧត្តរមានជ័យ បានសម្ដែងនូវសេចក្តី​សោមនស្ស​រីករាយយ៉ាងក្រៃលែង​ ដែល​បាន​ជួប​សំណេះសំណាល ​និងជូន​ដំណើរប្អូនៗយោធិន ​នៃកងរាជអាវុធហត្ថ ​ទើបជ្រើសរើសថ្មីចំនួន៣៧នាក់ ​ដើម្បី​ទៅ​ចូលរួមហ្វឹកហ្វឺន នៅមជ្ឈមណ្ឌល​ហ្វឹកហ្វឺន​កងរាជអាវុធហត្ថ (ភ្នំជុំសែនរីករាយ) ​ ​និង​សូមអបអរសាទរចំពោះប្អូនៗ ​យុវជនស្ម័គ្រ​ចិត្ត​ចូលបម្រើ​កងយោធពលខេមរភូមិន្ទ ក្នុង​ក្របខ័ណ្ឌកងរាជអាវុធហត្ថ ខេត្តឧត្តរមានជ័យ សូមជូនពរដល់​ប្អូនៗ​ សូមសម្រេចបានលទ្ធផលជោគជ័យក្នុងការហ្វឹកហ្វឺន។

ជាមួយគ្នានេះក្នុងនាមជាថ្នាក់ដឹកនាំនៃរដ្ឋបាលខេត្ត ឯកឧត្តម មាន ចាន់យ៉ាដា សូមថ្លែងអំណគុណ និង​កោតសរសើរ​ចំពោះ​ទឹក​ចិត្តរបស់ក្រុមគ្រួសារ ​មាតាបិតា ​អាណាព្យាបាលរបស់ប្អូនៗ ដែលបាន​អនុញ្ញាត ​លើកទឹកចិត្ត និងគាំទ្រឱ្យកូនចៅ​ ចូលបម្រើកងយោធពលខេមរភូមិន្ទ បំពេញក្របខណ្ឌ​ឱ្យកងរាជអាវុធហត្ថខេត្ត ​ដើម្បីចូលរួមបម្រើប្រទេសជាតិមាតុភូមិ ​និងប្រជាជននៃយើងទាំងអស់គ្នា។

ឯកឧត្តម ​បន្តថា បើទោះបីជាប្រទេសកម្ពុជាយើងបច្ចុប្បន្ននេះ ​មានសុខសន្តិភាពពេញបរិបូរ ស្ថិរភាព​នយោបាយ និងការអភិវឌ្ឍរីកចម្រើនលើគ្រប់វិស័យក៏ដោយ​ ក៏ប៉ុន្តែការកំណែទម្រង់ ​និងធ្វើ​ទំនើបកម្ម​កងកម្លាំងប្រដាប់អាវុធ ការ ហ្វឹកហ្វឺនរៀនសូត្រ ​ការ​កសាងហេដ្ឋារចនាសម្ព័ន្ធយោធា ការ​ថែរក្សាសុខុមាលភាពកង កម្លាំង ​ការបណ្តុះមនសិការស្នេហាជាតិ និងវិជ្ជាជីវៈកងកម្លាំងផ្សារភ្ជាប់​ទៅ​នឹងសីលធម៌ ​គុណធម៌ ​និងវិន័យ ​គឺជាការងារជាអាទិភាព​ ដើម្បីបន្តថែរក្សានូវសុខសន្តិភាព អធិបតេយ្យ​ ភាពជាតិ ​បូរណភាពទឹកដី និង​សន្តិសុខសុវត្ថិភាព​សណ្តាប់ធ្នាប់​សាធារណៈ​ ឱ្យបានគង់ វង្សស្ថិតស្ថេរយូរអង្វែង។

ក្នុងនោះដែរ​លោកឧត្តមសេនីយ៍ត្រី លី ដារិទ្ធ មេបញ្ជាការកងរាជអាវុធហត្ថខេត្ត ​ឧត្តរមានជ័យ ក៏បាន​ផ្តាំផ្ញើទៅយោធិនថ្មី ដែលត្រូវទៅ​ហ្វឹកហ្វឺន​ចេញដំណើរទៅនៅក្នុងថ្ងៃនេះ ត្រូវយកចិត្ត​ទុកដាក់ថែទាំសុខភាព​ព្រមទាំង​ខិតខំ​សិក្សារៀន​សូត្រ​យក​ចំណេះជំនាញ​គោរពវិន័យ​ទូទៅ​ឲ្យបានល្អប្រសើរ ដើម្បីប្រែក្លាយខ្លួន​ជាមន្ត្រីកងរាជអាវុធ​ហត្ថប្រកប​ដោយក្រមសីលធម៌ល្អ ក្នុងការ​បម្រើជាតិមាតុភូមិ និងប្រជាពលរដ្ឋផងដែរ៕