អាជ្ញាធរយោធា បាននិយាយកាលពីថ្ងៃព្រហស្បតិ៍ថា ខ្មាន់កាំភ្លើងសរុបចំនួន ៨.០៣៤នាក់ រួមទាំងក្រុមភេរវករដែលគេសង្ស័យ និងក្រុមចោរព្រៃ ត្រូវបានសម្លាប់ ដោយកងកម្លាំងប្រដាប់អាវុធនីហ្សេរីយ៉ា ក្នុងរយៈពេល ១១ខែ កន្លងទៅនេះ។

លោក Edward Buba អ្នកនាំពាក្យយោធា បានប្រាប់អ្នកយកព័ត៌មាន នៅទីក្រុង Abuja រដ្ឋធានីនីហ្សេរីយ៉ាថា យ៉ាងហោចណាស់ជនសង្ស័យចំនួន ១១.៦២៣នាក់ ត្រូវបានចាប់ខ្លួន នៅទូទាំងប្រទេសរវាងខែមករា ដល់ដើមខែធ្នូ។

លោក Buba បាននិយាយថា ចំណាប់ខ្មាំងជាង ៦.៣៧៦នាក់ ត្រូវបានជួយសង្គ្រោះ នៅក្នុងតំបន់នៃ ប្រតិបត្តិការយោធា ក្នុងរយៈពេលនោះ ដោយកត់សម្គាល់ថា ចាប់តាំងពីដើមឆ្នាំនេះ កងទ័ពត្រូវបានប្រឈមមុខនឹងការគំរាមកំហែងផ្សេងៗគ្នា នៅក្នុងតំបន់ប្រតិបត្តិការដ៏សកម្មចំនួន ៥ នៅទូទាំងប្រទេសនេះ។

លោកបាននិយាយថា កងទ័ពក៏បានរកឃើញអាវុធចំនួន ៨.២១៦ដើម និងគ្រាប់រំសេវសរុបចំនួន ២១១.៤៥៩ គ្រាប់ ពីខ្មាន់កាំភ្លើងដែលសង្ស័យ ក្នុងអំឡុងពេលប្រតិបត្តិការនោះ។

យោងតាមអ្នកនាំពាក្យរូបនេះ រហូតមកដល់ពេលនេះ យោធាបានអនុម័តកម្រិតខ្ពស់នៃការប្រុងប្រយ័ត្ន និងបង្កើនស្ថានភាពត្រៀមខ្លួន ដើម្បីការពារប្រទេសពីការឈ្លានពាន និងអសន្តិសុខបន្ថែមទៀតរបស់ក្រុម ភេរវករ។