គណៈកម្មាធិការជាតិរៀបចំការបោះឆ្នោត (NEC) របស់ប្រទេសកូរ៉េខាងត្បូង នៅថ្ងៃសុក្រ (ទី៦ ខែធ្នូ) នេះ បានប្រាប់ឲ្យដឹងថា រដ្ឋាភិបាល ដែលបានបញ្ជូនទាហានទៅកាន់ការិយាល័យរបស់ខ្លួន កាលពីយប់ថ្ងៃទី៣ ខែធ្នូ គឺជាការបំពានដោយជាក់ស្ដែងលើរដ្ឋធម្មនុញ្ញ និងច្បាប់ផ្សេងទៀតរបស់ប្រទេស ដោយប្តេជ្ញាចាត់វិធានការផ្លូវច្បាប់ ចំពោះអ្នកត្រូវទទួលខុសត្រូវ។

បន្ទាប់ពីមានកិច្ចប្រជុំបន្ទាន់របស់ទីភ្នាក់ងារ នាព្រឹកថ្ងៃទី៦ ខែធ្នូ នៅឯទីស្នាក់ការរបស់ខ្លួន ក្នុងទីក្រុង Gwacheon ខេត្ត Gyeonggi លោក Rho Tae-ak ប្រធានគណៈកម្មាធិការរៀបចំការបោះឆ្នោតគ្រប់គ្រងដោយរដ្ឋ បាននិយាយថា៖ «បន្ទាប់ពីច្បាប់អាជ្ញាសឹកបន្ទាន់ត្រូវបានប្រកាស កាលពីថ្ងៃទី៣ ខែធ្នូ កងកម្លាំងអនុវត្តច្បាប់អាជ្ញាសឹកប្រហែល ៣០០នាក់ បានសម្រុកចូលទៅក្នុងទីស្នាក់ការរបស់ NEC និងការិយាល័យផ្សេងទៀត»។

អមដោយការប្តេជ្ញាថា នឹងចាត់វិធានការចោទប្រកាន់តាមផ្លូវច្បាប់ប្រឆាំងនឹងសកម្មភាពបែបនេះនោះ លោក Roh បានបន្ថែមថា៖ «ទាហានបានរឹបអូសទូរសព្ទរបស់មន្ត្រី ៥នាក់ បិទច្រកចូល និងខណ្ឌរបងជុំវិញបរិវេណតំបន់ ដោយកាន់កាប់ទីស្នាក់ការរយៈពេល ៣ម៉ោង និង២០នាទី។ ការគ្រប់គ្រង NEC ដែលជាអង្គការឯករាជ្យមួយ នៅក្រោមរដ្ឋធម្មនុញ្ញ គឺជាការបំពានយ៉ាងច្បាស់ក្រឡែតលើរដ្ឋធម្មនុញ្ញ និងច្បាប់ពាក់ព័ន្ធដទៃទៀត»។

គួររំលឹកថា ប្រធានាធិបតី លោក Yoon Suk Yeol នៅវេលាម៉ោងប្រហែល ១០:២៥នាទី យប់ថ្ងៃទី៣ ខែធ្នូ បានប្រកាសច្បាប់អាជ្ញាសឹកបន្ទាន់ ដោយលើកឡើងពីតម្រូវការ ដើម្បីការពារប្រទេសពីអ្វីដែលលោកហៅថា «កម្លាំងប្រឆាំងរដ្ឋ»។

លោកបានពង្រាយកងទ័ពទៅកាន់ទីស្នាក់ការ NEC រដ្ឋសភា និងបានចាត់វិធានការចាប់ខ្លួនគូអរិនយោបាយដ៏លេចធ្លោរបស់លោក ដោយរួមមានមេដឹកនាំរបស់គណបក្សប្រជាធិបតេយ្យកូរ៉េ ដែលជាគណបក្សប្រឆាំងដ៏ធំ គឺលោក Lee Jae-myung និងមេដឹកនាំគណបក្សអំណាចប្រជាជន (PPP) ដែលកំពុងកាន់អំណាច គឺលោក Han Dong-hoon៕