ធនាគារពិភពលោក កាលពីថ្ងៃព្រហស្បតិ៍ (ទី៥ ខែធ្នូ) បានប្រកាសថា ខ្លួនបានរៃអង្គាសប្រាក់បានជិត ២៤ពាន់លានដុល្លារ ដើម្បីផ្តល់ជាប្រាក់កម្ចី និងជំនួយដល់ប្រទេសក្រីក្របំផុតមួយចំនួនរបស់ពិភពលោកដែលចំនួននេះអាចប្រើ ដើម្បីបង្កើតកម្លាំងចំណាយសរុបជាទឹកប្រាក់ខ្ពស់បំផុត ១០០ពាន់លានដុល្លារ។

អ្នកនាំពាក្យរបស់ធនាគារពិភពលោក បានប្រាប់សារព័ត៌មាន AFP ថា ប្រទេសម្ចាស់ជំនួយ បានសន្យាផ្តល់ជំនួយចំនួន ២៣,៧ពាន់លានដុល្លារ ដើម្បីបំពេញជំនួយកម្ចីសម្បទានរបស់ធនាគារដែលត្រូវបានគេស្គាល់ថា ជាសមាគមអភិវឌ្ឍន៍អន្តរជាតិ (IDA) ដោយនេះជាការកើនឡើងបន្តិចបន្តួចពីចំនួនប្រហែល ២៣,៥ពាន់លានដុល្លារ ដែលបានសន្យាដោយប្រទេសម្ចាស់ជំនួយ អំឡុងជុំរៃអង្គាសប្រាក់ចុងក្រោយ កាលពី ៣ឆ្នាំកន្លងទៅ។

ធនាគារអាចប្រើប្រាស់ប្រាក់នេះ ដើម្បីខ្ចីប្រាក់នៅលើទីផ្សារហិរញ្ញវត្ថុ ដោយអនុញ្ញាតឲ្យបង្កើនបរិមាណដែលបានលើកឡើងប្រហែល ៤ដង ដែលអាចបើកផ្លូវដល់ប្រាក់កម្ចី និងជំនួយថ្មីប្រហែល ១០០ពាន់លានដុល្លារ ដោយកើនឡើងពីចំនួន ៩៣ពាន់លានដុល្លារ ក្នុងឆ្នាំ២០២១។

ដោយសំដៅលើជុំផ្តល់មូលនិធិ IDA បច្ចុប្បន្ន សេចក្តីថ្លែងការណ៍របស់ធនាគារពិភពលោក បានរៀបរាប់ថា៖ «យើងជឿជាក់ថា ភាពជោគជ័យជាប្រវត្តិសាស្ត្រនៃការបំពេញបន្ថែម IDA21 នេះ គឺជាការបោះឆ្នោតនៃទំនុកចិត្ត និងការគាំទ្រពីម្ចាស់ជំនួយ និងអតិថិជន»។

នៅក្នុងសេចក្តីថ្លែងការណ៍ដាច់ដោយឡែកមួយ ដោយសំដៅទៅលើប្រទេសកំពុងអភិវឌ្ឍន៍ដែលមានសិទ្ធិទទួលបានការគាំទ្រពី IDA លោក Ajay Banga ប្រមុខធនាគារពិភពលោក បានលើកឡើងថា៖ «មូលនិធិនេះ នឹងត្រូវបានបញ្ជូនទៅគាំទ្រដល់ប្រទេសចំនួន ៧៨ ដែលត្រូវការបំផុត»៕