យោធាអ៊ីស្រាអែល និយាយនៅថ្ងៃសុក្រនេះថា ខ្លួនបានវាយប្រហារលើមជ្ឈមណ្ឌលផ្ទេរអាវុធ និងហេដ្ឋារចនាសម្ព័ន្ធយោធារបស់ក្រុមហេសបូឡាកាលពីយប់កន្លងទៅ នៅភាគីខាងប្រទេសស៊ីរីជាប់ព្រំដែនជាមួយលីបង់ ដោយពួកគេនិយាយថា ផ្លូវទាំងនេះ ត្រូវបានប្រើប្រាស់ដោយក្រុមប្រដាប់អាវុធហេសបូឡាគាំទ្រដោយអ៊ីរ៉ង់ ដើម្បីរត់ពន្ធអាវុធរបស់ពួកគេ ។

រូបភាពវីដេអូឃ្លីបនៃការវាយប្រហារនេះ ត្រូវបានបញ្ចេញដោយកងទ័ពអ៊ីស្រាអែលនៅលើបណ្តាញព័ត៌មានសង្គម Telegram ។ ទីភ្នាក់ងារព័ត៌មានរ៉យទ័រ ពុំអាចបញ្ជាក់ផ្ទៀងផ្ទាត់ដោយឯករាជ្យបាននោះទេ លើទីតាំង ឬពេលវេលានៃការថតវីដេអូមួយនេះ ។

ខណៈពេលនោះដែរ រដ្ឋមន្រ្តីដឹកជញ្ជូនលីបង់លោក Ali Hamieh និយាយថា ការវាយប្រហារតាមច្រកអាកាសរបស់អ៊ីស្រាអែល ត្រូវចំផ្លូវឆ្លងកាត់ព្រំដែន ២ខែ្ស រវាងប្រទេសលីបង់ និងប្រទេសស៊ីរី នៅព្រឹកថ្ងៃសុក្រនេះ ។

ទីភ្នាក់ងារព័ត៌មានរដ្ឋស៊ីរី SANA រាយការណ៍ថា ច្រកព្រំដែន Arida ឆ្លងកាត់ជាមួយលីបង់ លែងផ្តល់សេវាកម្ម ដោយសារការវាយប្រហារនេះ ៕