នគរបាលអូស្ត្រាលី បានឲ្យដឹងថា ខ្លួនជឿថា អគ្គិភ័យ នៅវិហារជ្វីហ្វ ក្នុងទីក្រុង Melbourne នាព្រឹកព្រលឹមថ្ងៃសុក្រ (ទី៦ ខែធ្នូ) នេះ គឺជាការដុតដោយចេតនាដែលអាចជាស្នាដៃរបស់ជនខិលខូចពាក់ម៉ាស់ ២នាក់ ដោយហេតុការណ៍នោះបណ្តាលឲ្យមនុស្សម្នាក់រងរបួស និងខូចខាតអគារយ៉ាងធ្ងន់ធ្ងរ។

នាយករដ្ឋមន្ត្រី លោក Anthony Albanese បានថ្កោលទោសការវាយប្រហារនេះ ហើយបាននិយាយថា មិនគួរមានទីកន្លែង សម្រាប់ការប្រឆាំងជនជាតិជ្វីហ្វ នៅក្នុងប្រទេសអូស្ត្រាលីនោះទេ។

លោក Albanese បានលើកឡើងនៅក្នុងសេចក្តីថ្លែងការណ៍ថា៖ «អំពើហិង្សា និងការបំភិតបំភ័យ និងការបំផ្លិចបំផ្លាញ នៅកន្លែងគោរពបូជា គឺជាទង្វើយង់ខ្នង។ ការវាយប្រហារនេះបានបង្កជាហានិភ័យដល់អាយុជីវិត ហើយមានគោលបំណងយ៉ាងច្បាស់ ដើម្បីបង្កើតការភ័យខ្លាច នៅក្នុងសហគមន៍»។ លោកបានAlbanese បានបន្ថែមថា នគរបាលប្រឆាំងភេរវកម្ម នឹងទាក់ទងជាមួយនគរបាលរដ្ឋ Victoria ពាក់ព័ន្ធនឹងការស៊ើបអង្កេតលើហេតុការណ៍នេះ។

នគរបាលរដ្ឋ Victoria បានប្រាប់ឲ្យដឹងថា អ្នកគោរពបូជាម្នាក់ ដែលបានទៅដល់វិហារជ្វីហ្វ Adass Israel ដើម្បីធ្វើការអធិដ្ឋាន នាពេលព្រឹក បានសង្កេតឃើញមនុស្ស ២នាក់ដែលហាក់ដូចជាកំពុងពង្រាយសារធាតុបង្កចំហេះ នៅខាងក្នុងវិហារនេះ។

អ្នកពន្លត់អគ្គិភ័យរាប់សិបនាក់ និងរថយន្តរាប់សិបគ្រឿង បានប្រញាប់ប្រញាល់ទៅកាន់វិហារជ្វីហ្វ នៅជាយក្រុង Ripponlea ភាគខាងត្បូងនៃទីក្រុង Melbourne វេលាម៉ោង ៤ព្រឹក ដើម្បីពន្លត់អគ្គិភ័យនោះ៕