ក្រុមបាតុករ បានជួបជុំគ្នានៅក្រៅរដ្ឋសភាកូរ៉េខាងត្បូងនៅថ្ងៃសុក្រនេះ ទាមទារឲ្យចាប់ខ្លួនលោកប្រធានាធិបតី Yoon Suk Yeol ក្រោយការប្រកាសច្បាប់អាជ្ញាសឹកកាលពីពេលកន្លងទៅរបស់លោក ។

 នៅក្នុងរដ្ឋសភា ក្រុមតំណាងរាស្រ្តប្រឆាំងបានជួបជុំគ្នា ពេលដែលពួកគេស្រែកពាក្យ “ចាប់ខ្លួនគាត់” ។

 នៅក្រៅអគាររដ្ឋសភា ស្ថិតក្នុងទីក្រុងសេអ៊ូល ក្រុមបាតុករនាំគ្នាឈរនៅលើជណ្តើរ ខណៈខាងក្នុងរដ្ឋសភា គណបក្សប្រឆាំងប៉ុនប៉ងចោទប្រកាន់លោក Yoon ដែលច្បាប់អាជ្ញាសឹករយៈពេល ៦ម៉ោងរបស់លោក បានធ្វើឲ្យមានការភ្ញាក់ផ្អើលនៅទូទាំងប្រទេស និងបានធ្វើឲ្យប្រទេសមហាអំណាចសេដ្ឋកិច្ចធំបំផុតទី ៤ប្រចាំនៅអាស៊ីមួយនេះ ធ្លាក់ក្នុងភាពពុំច្បាស់លាស់ផ្នែកនយោបាយ ។ 

 ក្រុមបាតុករដែលនាំគ្នាដង្ហែក្បួនតវ៉ា បានចាត់ទុកចំណាត់ការរបស់លោក Yoon ដែលជាការប្រកាសច្បាប់អាជ្ញាសឹកលើកដំបូង ចាប់តាំងពីកូរ៉េខាងត្បូងផ្លាស់ប្តូរទៅជាលទ្ធិប្រជាធិបតេយ្យកាលពីចុងទសវត្សរ៍ឆ្នាំ ១៩៨០នោះ ថាជារឿងឆ្កួតវង្វេង និងជារឿងដ៏គួរឲ្យអាម៉ាស់មុខបំផុតមួយ ។

 សម្រាប់អ្នកស្រី Mi-rye វ័យ ៦៤ឆ្នាំ ក្រឹត្យរយៈពេលខ្លីនេះ នាំមកនូវការចងចាំខ្មៅងងឹតពីអតីតកាលផ្តាច់ការដ៏ឈឺចាប់នៃការចាប់ខ្លួនទ្រង់ទ្រាយធំ និងការបំពានសិទ្ធិមនុស្ស ។

 អ្នកស្រីពុំអាចដេកបានទេ ដូច្នេះហើយអ្នកស្រីបានធ្វើដំណើរពីផ្ទះរបស់គាត់នៅទីក្រុង Paju ស្ថិតក្នុងខេត្ត Gyeonggi ជិតព្រំដែនកូរ៉េខាងជើង មកកាន់ទីក្រុងសេអ៊ូល ដើម្បីប្រយ័ត្នខ្លួន ។

 អ្នកស្រី Mi-rye រំឭកថា ក្រោយលោកឧត្តមសេនីយ៍កងទ័ព Chun Doo-hwan រឹបអូសអំណាចក្នុងរដ្ឋប្រហារ និងប្រកាសច្បាស់អាជ្ញាសឹកកាលពីទសវត្សរ៍ឆ្នាំ ១៩៨០ ពលរដ្ឋកូរ៉េខាងត្បូង រស់នៅក្រោមបំរាមគោចរដ៏តឹងរឹង ហើយអ្នករាល់គ្នាដែលបានចាប់ខ្លួនខាងក្រៅ ត្រូវបាននាំខ្លួនមកកាន់ជំរំកែប្រែឡើងវិញ Samcheong ។

 គួររំឭកថា ក្រោមការគ្រប់គ្រងរបស់ឧត្តមសេនីយ៍កងទ័ព Chun Doo-hwan ក្រុមប្រឆាំង ត្រូវបានចាប់ខ្លួន សាកលវិទ្យាល័យបានបិទទ្វារ សកម្មភាពនយោបាយ ត្រូវបានហាមឃាត់ ហើយសារព័ត៌មាន ត្រូវបានបង្រ្កាប ។ មនុស្សជិត ២០០នាក់ ត្រូវបានសម្លាប់នៅក្នុងឆ្នាំ ១៩៨០ ពេលដែលលោក Chun បញ្ជូនយោធាឲ្យទៅកម្ទេចបាតុកម្មគាំទ្រលទ្ធិប្រជាធិបតេយ្យរបស់ក្រុមនិស្សិត ៕