ភ្នំពេញ ៖ នៅថ្ងៃទី៦ ខែធ្នូ ឆ្នាំ២០២៤ ឯកឧត្តមកិត្តិនីតិកោសលបណ្ឌិត អ៉ឹម ឈុនលឹម ប្រធានក្រុមប្រឹក្សាធម្មនុញ បានអញ្ជើញក្នុងពិធីបំពាក់ឯកសណ្ឋានសម្រាប់ប្រើប្រាស់ក្នុងការបំពេញការងាររបស់ថ្នាក់ដឹកនាំ និងមន្រ្តីរាជការនៃអគ្គលេខាធិការដ្ឋានក្រុមប្រឹក្សាធម្មនុញ្ញសរុបចំនួន ១២៣រូប។ 

ពិធីនេះ ត្រូវបានរៀបចំឡើងដោយមានការយាង និងអញ្ជើញចូលរួមពីសំណាក់ សម្តេច លោក លោកស្រី សមាជិក សមាជិកាក្រុមប្រឹក្សាធម្មនុញ្ញ ថ្នាក់ដឹកនាំអគ្គលេខាធិការដ្ឋាន ថ្នាក់ដឹកនាំអគ្គនាយកដ្ឋាន និងមន្រ្តីរាជការ ព្រមទាំងភ្នាក់ងារជាតិជាប់កិច្ចសន្យាទាំងអស់ នៃអគ្គលេខាធិការដ្ឋានក្រុមប្រឹក្សាធម្មនុញ្ញ។ 

នៅក្នុងពិធីនេះ ឯកឧត្តមកិត្តិនីតិកោសលបណ្ឌិត អ៉ឹម ឈុនលឹម បានថ្លែងអំពីគោលបំណងនៃការរៀបចំឱ្យមានឯកសណ្ឋានការងារនេះ គឺដើម្បីការលើកកម្ពស់កិត្យានុភាព និងគុណតម្លៃរបស់ស្ថាប័ន, លើកកម្ពស់ប្រសិទ្ធភាពការងារ និងការទទួលខុសត្រូវក្នុងការអនុវត្តតួនាទី ភារកិច្ចរបស់មន្រ្តីរាជការ,ពង្រឹងស្មារតី ឥរិយាបថមន្ត្រីរាជការ ដើម្បីជាអត្តសញ្ញាណបង្ហាញដល់មជ្ឈដ្ឋានទូទៅ។ 

ឯកឧត្តម បានបញ្ជាក់បថា ការពាក់ឯកសណ្ឋាន គឺជាលក្ខណៈពិសេសសម្រាប់ស្ថាប័ននីមួយៗ ដ្បិតវាជាការបង្ហាញនូវសិទ្ធិអំណាច ការទទួលខុសត្រូវ បង្កប់នូវតម្លៃនៃសេវាសាធារណៈ ជាមួយនឹងភាពស្មោះត្រង់ របស់មន្ត្រីនៃស្ថាប័នមួយ ហើយការពាក់ឯកសណ្ឋានក៏ជាការបង្ហាញនូវការគោរពខ្លួនឯង ការគោរពស្ថាប័ន និងការគោរពសាធារណៈជនទូទៅផងដែរ។ 

 ឯកឧត្តម ក៏បានផ្តាំផ្ញើដល់មន្រ្តីរាជការទាំងអស់ឱ្យប្រកាន់ខ្ជាប់ខ្ជួនតាមច្បាប់ និងបទបញ្ជា គោរពឋានានុក្រមការងារ ទទួលខុសត្រូវខ្ពស់អំពីកិច្ចការងារ ព្រមទាំងប្រកាន់យកនូវអាកប្បកិរិយាថ្លៃថ្នូរ ដើម្បីរក្សាឱ្យបាននូវគុណតម្លៃរបស់ស្ថាប័ន ពោលគឺមន្ត្រីរាជការដែលស្ថិតក្នុងឯកសណ្ឋាននេះ ត្រូវបំពេញតួនាទីជាសេនាធិការប្រកបដោយក្រមសីលធម៌ និងជាជំនួយការដល់ក្រុមប្រឹក្សាធម្មនុញ្ញ ។  

ការបំពាក់ឯកសណ្ឋានសម្រាប់ប្រើប្រាស់ក្នុងការបំពេញការងារប្រចាំថ្ងៃនេះ ត្រូវបានផ្តួចផ្តើមបង្កើតឡើង និងឧបត្ថម្ភគាំទ្រដោយឯកឧត្តមកិត្តិនីតិកោសលបណ្ឌិត អ៊ឹម ឈុនលឹម ដែលត្រូវបានធ្វើឡើងក្នុងកាលៈទេសៈ ដែលប្រទេសជាតិ មានសុខសន្តិភាព និងការអភិវឌ្ឍលើគ្រប់វិស័យ ក្រោមការដឹកនាំប្រកបដោយគតិបណ្ឌិត និងឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងកំពុងបន្តដឹកនាំប្រកបដោយភាពស្វាហាប់ដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលតែងតែយកចិត្តទុកដាក់ខ្ពស់លើកកម្ពស់កំរិតជីវភាព និងកិត្តិយសរបស់មន្ត្រីរាជការ ការលើកកម្ពស់សមត្ថភាពធនធានមនុស្ស និងការពង្រឹងប្រសិទ្ធភាព នៃការអនុវត្តការងារនៅគ្រប់វិស័យ ដើម្បីសម្រេចបាននូវការអភិវឌ្ឍជាតិឲ្យបានសម្បូរណ៍រុងរឿង៕