​បាល់ទាត់៖ ​ក្រុម​កាំភ្លើង​ធំ Arsenal និង​តោ​ខៀវ Chelsea បាន​ដឹក​ដៃ​គ្នា​ឡើង​វគ្គ ៨​ក្រុម​ចុងក្រោយ​នៃ​ពានរង្វាន់ Carabao Cup ក្រោយ​យកឈ្នះ​គូប្រកួត​រៀងខ្លួន​យប់មិញ​។ ​Arsenal បើកទ្វារ​កីឡដ្ឋាន Emirate ទទួល​ភ្ញៀវ Leeds United តែ​គ្រាប់​បាល់​ត្រូវ​រង់ចាំ​ដល់​វគ្គ​ទី២ នាទី​ទី៥៥ ទើប​កីឡាករ​បម្រុង Callum Chambers តែ​ត​បញ្ចូល​ទី​នាំមុខ​។

​ក្រោយមក​អតីត​កីឡាករ​ដែល Leeds ធ្លាប់​ខ្ចី Eddie Nketiah ជា​អ្នកធានា​ជ័យជំនះ​ឱ្យ Arsenal នៅ​នាទី​ទី៦៩​។ ​សូមបញ្ជាក់ថា Arsenal មិនដែល​ឈ្នះ​ពាន Carabao Cup រឺ League Cup នេះ​តាំងពី​ឆ្នាំ១៩៩៣​។ ​​ក្រឡេក​មក​មួយគូ​ទៀត Chelsea បើកទ្វា​ផ្ទះ Stamford Bridge ទទួល Southampton​។ ​​ក្រុម​របស់លោក Thomas Tuchel រកបាន​គ្រាប់​នាំមុខ​នៅ​ចុង​វគ្គ​ទី១ នាទី​ទី៤៤ ដោយ​ខ្សែប្រយុទ្ធ​អាល្លឺម៉ង់ Kai Havertz តែ Che Adams ក៏​តាម​ស្មើ​ឱ្យ Southampton វិញ​នៅ​ដើម​វគ្គ​ទី២ នាទី​ទី៤៧​។ ​​មិនមាន​ប្រែប្រួល​ទៀតឡើយ ១-១ នេះ​រក្សា​ដល់​ចប់ ៩០នាទី​។

​​ឈានដល់​វគ្គ ១១កាត់សេចក្តី Mason Mount និង Theo Walcott ស៊ុត​មិន​ចូល​ដូចគ្នា​មុនពេល​ដែល Willy Smallbone របស់ Southampton ក៏​ស៊ុត​មិន​ចូល​នៅ​គ្រាប់​ទី៤ ហើយ Reece James គឺជា​អ្នក​ស៊ុត​សំរេច​គ្រាប់​ចុងក្រោយ​ឱ្យ Chelsea យកឈ្នះ Southampton នៅ​វគ្គ ១១ម៉ែត្រ​កាត់សេចក្តី​នេះ ៤-៣​។ ​​មួយគូ​ទៀត​យប់មិញ​ក៏​ស្មើគ្នា​រវាង Queens Park Rangers និង Sunderland រហូតដល់​វគ្គ ១១ម៉ែត្រ​កាត់សេចក្តី​ទើប Sunderland យកឈ្នះ ៣-១​។ ​​យប់​នេះ​នឹងមាន​ការប្រកួត​បន្តទៀត​រួមមាន Burnley ទទួល Spurs, Leicester City ទទួល Brighton, Preston ទទួល Liverpool, Stoke City ទទួល Brentford និង West Ham ទទួល Manchester City៕

​អត្ថបទ​៖​នាង សុភា​វុ​ធ