អតីតប្រធានាធិបតីអាមេរិក លោក Barack Obama ដែលភាគច្រើននៅស្ងៀមស្ងាត់ក្នុងរយៈពេលប៉ុន្មានសប្តាហ៍នេះ គិតចាប់តាំងពីការចាញ់ការបោះឆ្នោតរបស់អនុប្រធានាធិបតី លោកស្រី Kamala Harris កាលពីថ្ងៃព្រហស្បតិ៍ (ទី៥ ខែធ្នូ) នៅទីក្រុង Chicago បានជំរុញឲ្យមេដឹកនាំអាមេរិកជំនាន់ថ្មីនិយាយទៅកាន់អ្នកដែលខ្លួនមិនមានគំនិតយល់ស្របជាមួយ។

នៅក្នុងសុន្ទរកថាមួយ នៅឯវេទិកាប្រជាធិបតេយ្យដែលឧបត្ថម្ភដោយមូលនិធិរបស់លោក អតីតប្រធានាធិបតីរូបនេះ បាននិយាយថា លោកជឿជាក់ថា ការប្តេជ្ញាចិត្តជាថ្មី ចំពោះគោលការណ៍ពហុនិយម គឺចាំបាច់ ដើម្បីធានាដល់ការរស់រាននៃលទ្ធិប្រជាធិបតេយ្យ។

លោកបានលើកឡើងថា៖ «ជម្រើសជាច្រើនផ្សេងទៀត គឺជាអ្វីដែលយើងបានឃើញមាននៅសហរដ្ឋអាមេរិក និងនៅក្នុងបណ្ដាប្រទេសប្រកាន់លទ្ធិប្រជាធិបតេយ្យជាច្រើនទៀត ជុំវិញពិភពលោក ពោលគឺមិនមែនត្រឹមតែការមានភាពទាល់ច្រកកាន់តែច្រើនឡើងៗនោះទេ មិនមែនត្រឹមតែការចម្អកជាសាធារណៈប៉ុណ្ណោះទេ ប៉ុន្តែថែមទាំងមានការកើនឡើងនូវឆន្ទៈខ្លាំងឡើងៗរបស់អ្នកនយោបាយ និងអ្នកហែហមតាមពួកគេ ក្នុងការរំលោភលើបទដ្ឋានប្រជាធិបតេយ្យ ដោយធ្វើអ្វីស្រេចតែចិត្តដែលពួកគេអាចធ្វើបាន ដើម្បីសម្រេចគោលដៅរបស់ពួកគេ»។

លោក Obama បានពិភាក្សាអំពី «អំណាចពហុនិយម» ជាមួយអ្នកចូលរួមរាប់ពាន់នាក់ តាមការផ្សាយផ្ទាល់ និងតាមអនឡាញ ជុំវិញការបែកបាក់កាន់តែជ្រៅទៅៗ ក្នុងប្រវត្តិសាស្ត្រអាមេរិក និងជារឿងមួយដែលគណបក្សប្រជាធិបតេយ្យមិនអាចដោះស្រាយបាន ខណៈដែលលោក Donald Trump ខាងគណបក្សសាធារណរដ្ឋ វិលត្រលប់ទៅអង្គុយកៅអីសេតវិមានវិញ។

លោកបាននិយាយថា ការកសាងភាពអស្ចារ្យយូរអង្វែង ដែលគាំទ្រដល់យុត្តិធម៌ តម្រូវឲ្យ «កំណត់បញ្ហារបស់យើង បុព្វហេតុរបស់យើង អ្វីដែលយើងមានជំនឿលើ ពោលគឺពាក្យ «ពួកយើង» ដោយមិនមែនត្រឹមតែពាក្យ «យើង និងពួកគេ» នោះទេ។ យ៉ាងណាក្ដី លោកបានបញ្ជាក់បន្ថែមថា៖ «ប៉ុន្តែនោះមិនមែនមានន័យថា ព្រមចុះចាញ់ នៅពេលដែលគូប្រជែងរំលោភអំណាចនោះទេ។ នោះជាបញ្ហា។ ហើយពេលវាកើតឡើង យើងតស៊ូ ដើម្បីអ្វីដែលយើងជឿជាក់លើ»៕