មនុស្សរាប់ពាន់នាក់បានប្រមូលផ្តុំគ្នា នៅរដ្ឋធានី Bucharest នៃប្រទេសរ៉ូម៉ានី កាលពីល្ងាចថ្ងៃព្រហស្បតិ៍ (ទី៥ ខែធ្នូ) ដើម្បីគាំទ្រលទ្ធិប្រជាធិបតេយ្យ នៅមុនការបោះឆ្នោតប្រធានាធិបតីជុំទី២ នាថ្ងៃអាទិត្យចុងសប្ដាហ៍នេះ ដែលអាចឃើញបេក្ខជនស្តាំនិយមជ្រុលដែលរិះគន់សហភាពអឺរ៉ុប (EU) ចាញ់បេក្ខជនកណ្តាលនិយម ដែលគាំទ្រអឺរ៉ុប។

ការបោះឆ្នោត នៅថ្ងៃទី៣ ខែធ្នូ គឺជាលើកចុងក្រោយ ក្នុងចំណោមការបោះឆ្នោតចំនួន ៣ ជាប់ៗគ្នា ដើម្បីជ្រើសរើសទាំងសមាជិកសភា និងប្រធានាធិបតីថ្មី នៅរ៉ូម៉ានី ដែលជាប្រទេសសមាជិករបស់ EU និងអង្គការណាតូ (NATO) ហើយជាការប្រកួតប្រជែង រវាងបេក្ខជនស្តាំនិយមជ្រុល លោក Calin Georgescu ដែលគាំទ្ររុស្ស៊ី ជាមួយមេដឹកនាំកណ្តាលនិយម លោកស្រី Elena Lasconi។

ជ័យជម្នះរបស់លោក Georgescu នឹងធ្វើឲ្យគោលនយោបាយគាំទ្រលោកខាងលិចរបស់រូម៉ានីដួលរលំ ដោយជំរុញឲ្យប្រទេសនេះកាន់តែខិតទៅជិតនឹងក្រុមនៃបណ្ដារដ្ឋនៅអឺរ៉ុបភាគកណ្តាល និងភាគខាងកើត ដែលមានអ្នកនយោបាយស្តាំនិយមជ្រុលដ៏មានឥទ្ធិពលគាំទ្ររុស្សី ក្នុងនោះរួមមានទាំងហុងគ្រី ស្លូវ៉ាគី និងអូទ្រីសផងដែរ។

បណ្ដាតន្ត្រីករ អ្នកដឹកភាពយន្ត តារាសម្ដែង និងសកម្មជនពលរដ្ឋរ៉ូម៉ានី បានបង្ហាញការគាំទ្ររបស់ពួកគេ ចំពោះលោកស្រី Lasconi នៅឯកន្លែងប្រមូលផ្តុំ កាលពីយប់ថ្ងៃព្រហស្បតិ៍ នៅទីក្រុង Bucharest ដោយជំរុញអ្នកបោះឆ្នោតកុំធ្វើឲ្យប្រទេសនៅដាច់តែឯងពី EU និងអង្គការណាតូ។

នៅក្រោមសីតុណ្ហភាពត្រជាក់យ៉ាងខ្លាំង មនុស្សប្រហែល ៣.០០០នាក់ បាននាំគ្នាស្រែកថា «អឺរ៉ុប!» និង «គ្មានទេពួកហ្វាស៊ីសនិយម» ដោយកាន់បដាដែលសរសេរថា «លទ្ធិប្រជាធិបតេយ្យស្ថិតក្នុងគ្រោះថ្នាក់» និង «កូនចៅរបស់យើងនឹងមានសេរីភាព»។

គួរបញ្ជាក់ថា គណបក្សស្តាំនិយមជ្រុល ក៏ទទួលបានលទ្ធផលយ៉ាងល្អផងដែរ នៅក្នុងការបោះឆ្នោតសភា កាលពីថ្ងៃអាទិត្យសប្ដាហ៍មុន នៅប្រទេសរូម៉ានី ទោះបីជាគណបក្សប្រជាធិបតេយ្យសង្គម (Social Democrats) ដែលកំពុងកាន់អំណាច បានលេចឡើងជាក្រុមធំបំផុត និងសង្ឃឹមថា នឹងរួបរួមបង្កើតបានរដ្ឋាភិបាលចម្រុះដែលគាំទ្រសហភាពអឺរ៉ុបក៏ដោយ៕