កម្មវិធីស្បៀងអាហារពិភពលោក(WFP)របស់អង្គការសហប្រជាជាតិ(UN) បាននិយាយនៅថ្ងៃសុក្រនេះថា មនុស្ស ១,៥លាននាក់ ត្រូវបានគេរំពឹងថានឹងជម្លៀសខ្លួនដោយសារសង្រ្គាមនៅតំបន់ភាគពាយ័ព្យប្រទេសស៊ីរី ។

លោក Samer Abdeljaber គឺជាប្រធានផ្នែកសម្របសម្រួលគ្រាអាសន្ន ការវិភាគយុទ្ធសាស្ត្រ និងការទូតមនុស្សធម៌របស់ WFP បាននិយាយប្រាប់សន្និសីទសារព័ត៌មាននៅក្នុងទីក្រុងហ្សឺណែវ ប្រទេសស្វីសថា មនុស្ស ២៨.០០០នាក់ ត្រូវបានជម្លៀសខ្លួន ចាប់តាំងពីថ្ងៃទី ២៧ ខែវិច្ឆិកា រហូតមក ។

លោកបន្តថា បើសិនជាស្ថានភាពនៅតែវិវត្តទៅមុខតាមដំណាក់កាល ពួកយើងរំពឹងថា មនុស្សប្រហែល ១,៥លាននាក់ នឹងត្រូវជម្លៀសខ្លួន ហើយនិងត្រូវការការគាំទ្ររបស់ពួកយើង ។

គួរឲ្យដឹងថា ក្រុមឧទ្ទាមដណ្តើមបានទីក្រុងសំខាន់ Aleppo នៅភាគខាងជើងស៊ីរីកាលពីសប្តាហ៍មុន ហើយចាប់តាំងពីពេលនោះមក ពួកគេបានរុលទៅទិសខាងត្បូងចេញពីតំបន់កាន់កាប់របស់ពួកគេនៅភាគពាយ័ព្យស៊ីរី និងដណ្តើមបានទីក្រុង Hama ។

លោក Abdeljaber បានព្រមានផងដែរថា ស៊ីរី កំពុងស្ថិតនៅក្នុងចំណុចបែកបាក់ ហើយមុនវិបត្តិនាពេលថ្មីៗនេះ ពលរដ្ឋស៊ីរី ១២,៩លាននាក់ ជួបអសន្តិសុខស្បៀងរួចទៅហើយ ក្នុងនោះពលរដ្ឋ ៣លាននាក់ ស្ថិតក្នុងអសន្តិសុខស្បៀងធ្ងន់ធ្ងរ ៕