គណបក្ស Bharatiya Janata Party (BJP) របស់នាយករដ្ឋមន្ត្រីឥណ្ឌា លោក Narendra Modi បានចោទប្រកាន់ក្រសួងការបរទេស និងកម្លាំងចលករសម្ងាត់នានា នៅសហរដ្ឋអាមេរិកថា បានព្យាយាមធ្វើឲ្យប្រទេសឥណ្ឌាមានអស្ថិរភាព ហើយក្រុមអ្នកសារព័ត៌មានស៊ើបអង្កេត និងមេដឹកនាំបក្សប្រឆាំង លោក Rahul Gandhi ក៏មានចេតនាទុច្ចរិតដូចគ្នាដែរ។

ការចោទប្រកាន់នេះ បានកើតមានឡើងដ៏គួរឲ្យភ្ញាក់ផ្អើល ខណៈដែលទីក្រុងញូវដេលី និងទីក្រុងវ៉ាស៊ីនតោន បានបង្កើតនូវទំនាក់ទំនងដ៏រឹងមាំ ក្នុងរយៈពេល ២ទសវត្សរ៍ចុងក្រោយនេះ ហើយប្រទេសទាំង២ បានប្តេជ្ញាពង្រឹងចំណងទាក់ទងនោះបន្ថែមទៀត បើទោះបីជាមានការខ្វែងគំនិតគ្នា និងការទាស់ចិត្តគ្នាខ្លះៗក៏ដោយ។

គណបក្សកាន់អំណាច កាលពីថ្ងៃព្រហស្បតិ៍ (ទី៥ ខែធ្នូ) បានឲ្យដឹងថា ដើម្បីធ្វើឲ្យប៉ះពាល់ដល់លោក Modi គណបក្ស Congress របស់លោក Gandhi បានប្រើប្រាស់អត្ថបទរបស់អង្គការ Organized Crime and Corruption Reporting Project (OCRP) ដែល «ផ្តោតទាំងស្រុង» លើក្រុមហ៊ុន Adani និងការចោទប្រកាន់ពីភាពស្និទ្ធស្នាលរបស់ក្រុមហ៊ុននេះជាមួយរដ្ឋាភិបាល។

គួរបញ្ជាក់ថា ប្រធានក្រុមហ៊ុន លោក Gautam Adani និងមនុស្ស ៧នាក់ផ្សេងទៀត ត្រូវបានចោទប្រកាន់កាលពីខែមុន នៅសហរដ្ឋអាមេរិក ពីបទមានចំណែកនៅក្នុងគម្រោង ២៦៥ពាន់លានដុល្លារអាមេរិក ដើម្បីសូកប៉ាន់មន្ត្រីឥណ្ឌា ជាការចោទប្រកាន់ដែលក្រុមហ៊ុនបានហៅថា «គ្មានមូលដ្ឋានច្បាស់លាស់»។

អត្ថបទរបស់ OCCRP ក៏បានចោទប្រកាន់ផងដែរ ចំពោះពួកចោរព័ត៌មានវិទ្យាដែលឧបត្ថម្ភដោយរដ្ឋ នៅប្រទេសឥណ្ឌាថា បានប្រើប្រាស់មេរោគ Pegasus ដែលបង្កើតដោយអ៊ីស្រាអែល ដើម្បីកំណត់គោលដៅអ្នករិះគន់រដ្ឋាភិបាល។ កន្លងមក រដ្ឋាភិបាលបានបដិសេធការចោទប្រកាន់ទាំង ២ នោះ។ 

គណបក្ស BJP ធ្លាប់បានចោទប្រកាន់លោក Gandhi អង្គការ OCCRP និងមហាសេដ្ឋីវ័យ ៩២ឆ្នាំ លោក George Soros ថា បានវាយប្រហារលោក Modi។ ហើយកាលពីថ្ងៃព្រហស្បតិ៍ គណបក្សនេះ បានដកស្រង់របាយការណ៍ពីប្រព័ន្ធផ្សព្វផ្សាយបារាំងដែលបានរាយការណ៍ថា អង្គការ OCCRP ត្រូវបានផ្តល់មូលនិធិដោយទីភ្នាក់ងារសហរដ្ឋអាមេរិក ដើម្បីការអភិវឌ្ឍន៍អន្តរជាតិ និងដោយ «ឥស្សរជនមានឥទ្ធិពលសម្ងាត់នានា» ដូចជាលោក Soros ជាដើម៕

Vannak BTV, [12/6/2024 7:54 PM]