នាយករដ្ឋមន្រ្តីក្រូអាស៊ី លោក Andrej Plenkovic នៅថ្ងៃសុក្រ បានរួចផុតពីញត្តិដកសេចក្ដីទុកចិត្ត នៅក្នុងសភា ប្រឆាំងនឹងរដ្ឋាភិបាលគាំទ្រសហភាពអឺរ៉ុបរបស់លោកជាលើកទី២ ក្នុងឆ្នាំនេះ ដែលបានបើកដំណើរការលើសំណុំរឿងដ៏ល្បីមួយ ជុំវិញការចោទប្រកាន់ពីបទពុករលួយពាក់ព័ន្ធនឹងអតីតរដ្ឋមន្ត្រី។

ញត្តិនេះត្រូវបានផ្តួចផ្តើមឡើងដោយគណបក្សប្រឆាំង គឺសង្គមប្រជាធិបតេយ្យ (SDP) ដោយលើកឡើងពីការមានចំណែកពាក់ព័ន្ធរបស់រដ្ឋមន្ត្រីរដ្ឋាភិបាល និងមន្ត្រីនៃគណបក្សសហភាពប្រជាធិបតេយ្យក្រូអាត (HDZ) ដែលកំពុងកាន់អំណាច នៅក្នុងសំណុំរឿងពុករលួយជាបន្តបន្ទាប់ ក្នុងប៉ុន្មានឆ្នាំថ្មីៗនេះ។ នៅថ្ងៃសុក្រនេះ សមាជិកសភាចំនួន ៧៦រូប ក្នុងចំណោមសមាជិកសភាចំនួន ១៤០រូប បានបោះឆ្នោតប្រឆាំងនឹងសំណើនេះ ហើយ ៦៤រូប គាំទ្រ។

គួរបញ្ជាក់ថា ករណីចុងក្រោយនេះ ពាក់ព័ន្ធនឹងការចាប់ខ្លួន និងបណ្តេញរដ្ឋមន្ត្រីសុខាភិបាល លោក Vili Beros កាលពីខែមុន ជុំវិញករណីសង្ស័យពុករលួយ ដោយរដ្ឋអាជ្ញាអឺរ៉ុប បានចោទប្រកាន់លោកពីបទទទួលសំណូក។

អំឡុងពេលជជែកដេញដោល ក្នុងសភា ស្ដីអំពីញត្តិនេះ លោក Plenkovic បាននិយាយថា រដ្ឋាភិបាលបានគាំទ្រការងាររបស់ភ្នាក់ងារប្រឆាំងអំពើពុករលួយ និងការិយល័យរបស់រដ្ឋអាជ្ញា ជុំវិញករណីរបស់លោក Beros ដែលបដិសេធមិនបានធ្វើអ្វីខុស៕