ពៅធិ៍សាត់ ៖ ឯកឧត្តមបណ្ឌិតសភាចារ្យ ហង់ជួន ណារ៉ុង ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំយុវជននិងកីឡា បានអញ្ជើញជាអធបតីភាពក្នុងពិធីប្រកាសចូលកាន់មុខតំណែង លោក លឹម វុទ្ធី ប្រធានមន្ទីរអប់រំយុវជននិងកីឡាខេត្តពោធិ៍សាត់ ជំនួសលោក លី សុគន្ធី ដែលត្រូវចូលនិវត្តន៍ និងពិធីប្រគល់អនុក្រឹត្យតែងតាំង ជូនលោក លោកស្រីប្រធានមន្ទីរអប់រំយុវជននិងកីឡា មកពីបណ្តារាជធានីខេត្តចំនួន២១រូបផ្សេងទៀត ។ ពិធីនេះត្រូវបានរៀបចំធ្វើឡើងនៅសាលប្រជុំសាលាខេត្តពោធិ៍សាត់ នារសៀលថ្ងៃទី៦ ខែធ្នូ ឆ្នាំ២០២៤ ដោយមានការអញ្ជើញចូលរួមពី ឯកឧត្តម ម៉ក់រ៉ា ប្រធានក្រុមប្រឹក្សាខេត្ត ឯកឧត្តម ខូយ រីដា អភិបាលខេត្ត ថ្នាក់ដឹកនាំក្រសួងអប់រំ ប្រធានមន្ទីរតាមបណ្តារាជធានីខេត្ត មន្ត្រីរាជការចំណុះមន្ទីរអប់រំខេត្ត ម រដ្ឋបាលក្រុងស្រុក និងលោកគ្រូអ្នកគ្រូជាច្រើនរូប ។ 

ជាកិច្ចចាប់ផ្តើម ឯកឧត្តម ខូយ រីដា បានឡើងមានមតិស្វាគមន៍ និងអានរបាយការណ៍អំពីស្ថានភាពរបស់វិស័យអប់រំក្នុងខេត្តពោធិ៍សាត់ ។ បន្ទាប់ពីលោកស្រី នេត អង្គារតន៍ ប្រធាននាយកដ្ឋានធនធានមនុស្សនៃក្រសួងអប់រំយុវជននិងកីឡា អានអនុក្រឹត្យ លេខ៩២២ អនក្រ.តត ស្តីពីការតែងតាំងមន្ត្រីរាជការចំនួន២២រូប ជាប្រធានមន្ទីរអប់រំយុវជននិងកីឡា រាជធានីខេត្ត រួចមកឯកឧត្តមបណ្ឌិតសភាចារ្យ ហង់ជួន ណារ៉ុង បានអញ្ជើញប្រគល់អនុក្រឹត្យតែងតាំង និងត្រារបស់មន្ទីរជូនលោក លឹម វុទ្ធី ជាប្រធានមន្ទីរអប់រំយុវជននិងកីឡាខេត្តពោធិ៍សាត់ និងប្រគល់អនុក្រឹត្យតែងតាំងជូនលោក លោកស្រីប្រធានមន្ទីរអប់រំយុវជននិងកីឡាមកពីរាជធានីខេត្តចំនួន២១រូប ព្រមទាំងបំពាក់មេដាយការងារជូនលោក លី សុគន្ធី អតីតប្រធានមន្ទីរអប់រំយុវជននិងកីឡាខេត្តពោធិ៍សាត់ ។

លោក លឹម វុទ្ធី បានថ្លែងអំណរគុណដល់រាជរដ្ឋាភិបាល និងថ្នាក់ដឹកនាំដែលផ្តល់ទំនុកចិត្តនិងផ្តល់ឱកាស ប្រគល់តួនាទីភារកិច្ចជាប្រធានមន្ទីរអប់រំយុវជននិងកីឡាខេត្តពោធិ៍សាត់ ហើយលោកសូមធ្វើការបេជ្ញាចូលរួមអភិវឌ្ឍមូលធនមនុស្សក្នុងយុគសម័យបរិវត្ត កម្មឌីជីថល ប្រកបដោយប្រសិទ្ធិភាព និងការទទួលខុសត្រូវខ្ពស់។ ក្នុងតួនាទីភារកិច្ចជាប្រធានមន្ទីរអប់រំ យុវជន និងកីឡាខេត្ត នឹងខិតខំស្វែងយល់ និងរៀនសូត្របន្ថែមទៀតនូវបទពិសោធន៍ការងារក្នុងការដឹកនាំអង្គភាព ពីសំណាក់ថ្នាក់ ដឹកនាំក្រសួងអប់រំ យុវជន និងកីឡា និងថ្នាក់ដឹកនាំនៃរដ្ឋបាលខេត្តគ្រប់ជាន់ថ្នាក់។ ទន្ទឹមនឹងនេះ ក៏នឹងខិតខំបង្កើនគំនិតច្នៃ ប្រឌិតថ្មីៗបន្ថែមទៀតដើម្បីឆ្លើយតបទៅនឹងការអភិវឌ្ឍន៍និងធ្វើឱ្យកាន់តែមានជំនឿចិត្តពីសំណាក់ក្រសួង ក្រុមប្រឹក្សា និងគណៈអភិបាលខេត្ត ។

ក្នុងឱកាសនោះ ឯកឧត្តមបណ្ឌិតសភាចារ្យ ហង់ជួន ណារ៉ុង បានថ្លែងអបអរសាទរលោកប្រធានមន្ទីរថ្មី និងសូមអបអរសាទរដល់លោក លោកស្រី ប្រធានមន្ទីររាជធានីខេត្តត្រូវបានរាជរដ្ឋាភិបាលចេញអនុក្រឹត្យតែងតាំងឡើងវិញដំឡើងឋានៈស្មើនឹងប្រធាននាយកដ្ឋាន។ ឆ្លៀតក្នុងឱកាសនេះ ឯកឧត្តមបណ្ឌិតសភាចារ្យ សូមថ្លែងអំណរគុណដល់សម្តេចបវរធិបតី ហ៊ុន ម៉ាណែត ដែលបានធ្វើកំណែទម្រង់មួយ គឺការបង្កើនឋានៈ ក៏ដូចជាតួនាទី របស់ប្រធានមន្ទីររាជធានីខេត្តឱ្យមានឋានៈខ្ពស់ជាងមុន ក្នុងគោលដៅពង្រឹងសមត្ថភាពការងារ និងជាការលើកទឹកចិត្តឱ្យមន្ទីរជុំវិញខេត្តអនុវត្តន៍នូវកម្មវិធីកំណែទម្រង់ជាពិសេសគឺ យុទ្ធសាស្ត្រយុទ្ធសាស្ត្របញ្ចកោណ ដំណាក់កាលទី១ ដែលសម្រេចបវរធិបតីបានដាក់ចេញមួយឆ្នាំកន្លងមកនេះ ហើយក៏បានកំពុងតែអនុវត្តន៍ ។ ក្នុងនេះដែរ ឯកឧត្តមបណ្ឌិតសភាចារ្យ សូមថ្លែងអំណរគុណដល់ ឯកឧត្តមអភិបាលខេត្តពោធិ៍សាត់ បានយកចិត្តទុកដាក់វិស័យអប់រំក្នុងខេត្តដោយបានខិតខំប្រឹងប្រែងអភិវឌ្ឍន៍កសាង កែប្រែវិទ្យាល័យពោធិ៍សាត់ ឱ្យក្លាយទៅជាសលាគំរូនៅពេលអនាគត់ តាមរយៈការវាយតំលៃដោយក្រុមការងារក្រសួង ដែលមានសូចនាករឬស្តង់ដាចំនួន៥ គឺទី១.លទ្ធផលការសិក្សារបស់សិស្ស ទី២.ការបង្រៀននិងរៀន ទី៣. ការចូលរួមរបស់សហគមន៍ ទី៤.ដំណើរប្រតិបត្តិការនិងរដ្ឋបាលសាលារៀន និងទី៥.គណនេយ្យភាពរបស់សាលារៀន ឯកឧត្តមបណ្ឌិតសភាចារ្យបានបន្តថា តាមការតាមដាននិងចុះពិនិត្យដោយផ្ទាល់ ជាការពិតណាស់វិទ្យាល័យពោធិ៍សាត់ កំពុងតែត្រូវបានកែលម្អជាបន្តបន្ទាប់ មានទាំងការចូលរួមរបស់មាតាបិតា ការប្រឹងប្រែងរបស់លោកគ្រូអ្នកគ្រូ ការប្រឹងប្រែងរបស់សិស្សានុសិស្ស និងការពង្រឹងនូវការគ្រប់គ្រងរបស់នាយកសាលា និងការជួយគាំទ្រ ជ្រោមជ្រែងពីរដ្ឋបាលខេត្ត ហើយឯកឧត្តមបណ្ឌិតសភាចារ្យជឿរជាក់ថា វិទ្យាល័យពោធិ៍សាត់ នឹងអាចទទួលបានការវាយតំលៃក្លាយជាសាលាគំរូនៅពេលខាងមុខនេះ ៕ ភិរុណ ពៅ