អ្នកនាំពាក្យវិមានក្រឹមឡាំង លោក Dmitry Peskov ត្រូវបានដកស្រង់សម្តីដោយទីភ្នាក់ងារសារព័ត៌មានរដ្ឋ RIA ដែលបាននិយាយនៅថ្ងៃសុក្រនេះថា ប្រទេសរុស្ស៊ី និងបេឡារុស នឹងបញ្ចប់សព្វគ្រប់នូវសន្ធិសញ្ញា ស្តីពីការធានាសន្តិសុខឲ្យគ្នាទៅវិញទៅមក ជាផលប្រយោជន៍នៃប្រទេសទាំង២។

គួរបញ្ជាក់ថា ប្រធានាធិបតីបេឡារុស លោក Alexander Lukashenko នឹងធ្វើជាម្ចាស់ផ្ទះទទួលប្រធានាធិបតីរុស្ស៊ី លោក Vladimir Putin ក្នុងកិច្ចប្រជុំកំពូល នៅទីក្រុង Minsk នាថ្ងៃសុក្រនេះ ដើម្បីប្រារព្ធខួបលើកទី២៥ នៃរដ្ឋសហភាព ដែលជាសហភាព និងសម្ព័ន្ធភាពគ្មានព្រំដែន រវាងអតីតសាធារណរដ្ឋនៃសហភាពសូវៀត និងប្រទេសជិតខាងទាំង២។

ដោយសំដៅទៅលើសន្ធិសញ្ញានេះ លោក Peskov ដែលត្រូវបានដកស្រង់សម្តីដោយសារព័ត៌មាន RIA បាននិយាយថា៖ «នេះគឺជាគំនិតផ្តួចផ្តើមផ្ដល់ផលប្រយោជន៍ឲ្យគ្នាទៅវិញទៅមកយ៉ាងពិតប្រាកដ។ ភាពសមហេតុសមផលនៃការវិវត្តន៍នៃព្រឹត្តិការណ៍នេះ បង្ហាញពីតម្រូវការឲ្យមានឯកសារបែបនេះ»។

គួររំលឹកដែរថា លោក Putin បានអនុម័តការកែប្រែ កាលពីខែមុន ដែលបានបន្ទាបកម្រិតគោលការណ៍ ដើម្បីវាយប្រហារដោយនុយក្លេអ៊ែររបស់ប្រទេសរុស្ស៊ី និងបានពង្រីកឆ័ត្រការពារនុយក្លេអ៊ែររបស់ទីក្រុងមូស្គូ ដោយគ្របដណ្តប់ដល់ប្រទេសបេឡារុស ដែលជាសម្ព័ន្ធមិត្តដ៏សំខាន់៕