អង្គការសុខភាពពិភពលោក បាននិយាយកាលពីថ្ងៃសុក្រទី៦ ខែធ្នូ ថា ខ្លួនកំពុង​ដាក់​ពង្រាយ​អ្នក​ជំនាញ ដើម្បីជួយដល់អាជ្ញាធរសុខាភិបាលក្នុងសាធារណរដ្ឋប្រជាធិបតេយ្យកុងហ្គោ ដើម្បីស៊ើប​អង្កេត​ជំងឺ​ដែលពុំទាន់កំណត់អត្តសញ្ញាណ ពាក់ព័ន្ធនឹងអ្នកស្លាប់ច្រើននាក់ នៅក្នុងតំបន់ដាច់​ស្រយាល​របស់ប្រទេស។

អ្នកជំនាញរបស់អង្គការសុខភាពពិភពលោក កំពុងធ្វើដំណើរទៅកាន់តំបន់ Panzi ជាតំបន់​មួយ​ក្នុង​ខេត្ត Kwango ភាគនិរតី ជាកន្លែងដែលពួកគេនឹងនាំយកឱសថសំខាន់ៗ និងឧបករណ៍​វិភាគ​រោគ ដើម្បីជួយវិភាគរកមូលហេតុនៃជំងឺ។

អង្គការសុខភាពពិភពលោក(WHO) និយាយថា ការធ្វើតេស្ត​នៅ​មន្ទីរពិសោធន៍​កំពុង​ត្រូវ​បាន​អនុវត្ត​ដើម្បីកំណត់ពីមូលហេតុ។ លោកស្រី Matshidiso Moeti នាយកប្រចាំតំបន់​របស់​អង្គការ​សុខភាព​ពិភពលោកប្រចាំទ្វីបអាហ្រ្វិក បាននិយាយថា «អាទិភាពរបស់យើង គឺផ្តល់ការគាំទ្រ​ដោយ​ប្រសិទ្ធ​ភាពដល់គ្រួសារ និងសហគមន៍ដែលរងផលប៉ះពាល់»។

លោកស្រី បាននិយាយបន្ថែមថា «កិច្ចខិតខំប្រឹងប្រែងទាំងអស់កំពុងដំណើរការ ដើម្បីកំណត់​ពី​មូល​ហេតុ​នៃជំងឺ ស្វែងយល់ពីវិធីនៃការចម្លងរបស់ជំងឺ និងធានាឱ្យមាន​ការ​ឆ្លើយ​តប​សម​ស្រប​ឱ្យ​បាន​លឿន​តាមដែលអាចធ្វើទៅបាន»។

អង្គការសុខភាពពិភពលោក និយាយថា រហូតមកដល់ពេលនេះមានករណីចំនួន ៣៩៤ ករណី និងអ្នកស្លាប់ចំនួន ៣០ នាក់ត្រូវបានរាយការណ៍មកក្នុងតំបន់សុខភាព Panzi ដោយដកស្រង់​ទិន្នន័យ​ពី​ក្រសួងសុខាភិបាលសាធារណៈ។

រោគសញ្ញានៃជំងឺនេះរួមមាន ឈឺក្បាល ក្អក ក្តៅខ្លួន ពិបាកដកដង្ហើម និងមានភាពស្លេកស្លាំង។