ចិន៖ ការរាប់ថយក្រោយរយៈពេល ១០០ថ្ងៃដើម្បីចាប់ផ្ដើមព្រឹត្តិការណ៍កីឡាអូឡាំពិករដូវរងា នៅទីក្រុងប៉េកាំងបានចាប់ផ្តើមកាលពីថ្ងៃអង្គារ ខណៈពេលមានការគំរាមកំហែងនៃការធ្វើពហិការនៅក្រៅប្រទេស និងការព្រួយបារម្ភពីការឆ្លងរាលដាលវីរុសកូរ៉ូណា។ ក្រុមអ្នកទស្សនាដែលដើរទិញឥវ៉ាន់តាមដងផ្លូវកណ្ដាលទីក្រុងប៉េកាំងបានប្រមូលផ្តុំគ្នានៅមុខនាឡិកា និងអបអរសាទរនៅពេលឈានដល់ ១០០ថ្ងៃ ២៣ម៉ោង ៥៩នាទី និង ៥៩វិនាទី។
ពេលវេលានៃការប្រារព្ធពិធីនេះបានកើតឡើង ស្របពេលប្រទេសចិនព្យាយាមទប់ស្កាត់ការរឆ្លងរាលដាលវីរុសកូរ៉ូណាថ្មីៗ។ ករណីឆ្លងថ្មីជាង ១០០នាក់ត្រូវបានរាយការណ៍នៅភាគពាយ័ព្យ នៃតំបន់ស្វយ័តម៉ុងហ្គោលីខាងក្នុងខេត្ត Gansu និងខេត្តផ្សេងទៀតទូទាំងប្រទេសដែលនាំឱ្យមានការរឹតត្បិតការធ្វើដំណើរ និងការបិទខ្ទប់សហគមន៍ជាដើម។ យោងតាមគណៈកម្មាធិការអូឡាំពិកអន្តរជាតិបានឱ្យដឹងថា ក្រុមអត្តពលិកអូឡាំពិក និងបុគ្គលិកគាំទ្រដែលមកដល់សម្រាប់ការប្រកួតនេះតម្រូវឱ្យចាក់វ៉ាក់សាំង ឬត្រូវដាក់ឱ្យនៅដាច់ដោយឡែករយៈពេល ៣សប្តាហ៍ក្រោមការត្រួតពិនិត្យយ៉ាងតឹងរ៉ឹង។ មានតែអ្នកទស្សនាមកពីក្នុងប្រទេសចិនប៉ុណ្ណោះ ដែលត្រូវបានអនុញ្ញាតឱ្យទិញសំបុត្រចូលទស្សនាការប្រកួតនេះដោយផ្ទាល់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
