អ្នកគាំទ្រលោក Yoon Suk Yeol បាននាំគ្នាសម្រុកចេញទៅប្រមូលផ្ដុំគ្នាតាមដងផ្លូវក្នុងទីក្រុងសេអ៊ូល ក្នុងចំនួនដ៏ច្រើន នៅថ្ងៃសៅរ៍ (ទី៧ ខែធ្នូ) នេះ ដើម្បីជាការបង្ហាញនូវការគាំទ្រយ៉ាងខ្លាំងក្លា ចំពោះប្រធានាធិបតីកូរ៉េខាងត្បូង ដែលកំពុងប្រឈមនឹងការបោះឆ្នោតចោទប្រកាន់ពីសមាជិកសភា នៅយប់ថ្ងៃនេះ។

ក្រុមបាតុកររាប់ពាន់នាក់ បានបង្ហាញខ្លួននៅទីលាន Gwanghwamun ដោយនាំគ្នាច្រៀង រាំ គ្រវីស្លាកសញ្ញា និងទង់ជាតិកូរ៉េខាងត្បូង និងសហរដ្ឋអាមេរិក ខណៈដែលសមាជិកសភា នឹងបោះឆ្នោតលើញត្តិចោទប្រកាន់លោក Yoon ជុំវិញការប៉ុនប៉ងដ៏ខ្ជីខ្ជារបស់លោក ក្នុងការដាក់ចេញច្បាប់អាជ្ញាសឹក កាលពីដើមសប្តាហ៍នេះ។

បើទោះបីជាលោក Yoon បានសុំអភ័យទោស នៅថ្ងៃសៅរ៍នេះ សម្រាប់ការប៉ុនប៉ងរបស់លោក ក្នុងការដាក់ចេញច្បាប់អាជ្ញាសឹក ក្នុងសប្តាហ៍នេះក៏ដោយ ក៏លោកមិនបានលាលែងពីតំណែងនោះដែរ ដោយបានផ្គើននឹងការដាក់សម្ពាធដ៏ខ្លាំង ដើម្បីឲ្យលោកចុះចេញពីតំណែង សូម្បីតែពីសមាជិកមួយចំនួន នៅក្នុងបក្សកាន់អំណាចរបស់លោក។

យ៉ាងណាក្ដី លោក Yoon បានសង្កត់ធ្ងន់ថា លោកនឹងមិនស្វែងរកការបញ្ចៀសការទទួលខុសត្រូវផ្នែកច្បាប់ និងនយោបាយនោះឡើយ ពាក់ព័ន្ធនឹងការសម្រេចចិត្តរបស់លោក ក្នុងការប្រកាសច្បាប់អាជ្ញាសឹកជាលើកដំបូង នៅប្រទេសកូរ៉េខាងត្បូង គិតចាប់តាំងពីឆ្នាំ១៩៨០ មក។ លោកបានបញ្ជាក់ថា ការសម្រេចនេះ គឺកើតចេញពីក្ដីអស់សង្ឃឹម៕