រដ្ឋាភិបាលអូស្ត្រាលី នៅថ្ងៃសៅរ៍ (ទី៧ ខែធ្នូ) នេះ បានការពារកំណត់ត្រារបស់ខ្លួន ស្តីពី​ការ​ទប់​ស្កាត់​ការ​ប្រឆាំងជនជាតិជ្វីហ្វ បន្ទាប់ពីនាយករដ្ឋមន្ត្រីអ៊ីស្រាអែល លោក Benjamin Netanyahu បាន​ចោទ​ប្រកាន់ថា ប្រទេសនេះមានគោលនយោបាយប្រឆាំងនឹងអ៊ីស្រាអែល បន្ទាប់ពីមាន​ការ​វាយ​ប្រហារ​ដោយដុត នៅវិហារជ្វីហ្វ ក្នុងទីក្រុង Melbourne។

លោក Netanyahu បានចោទប្រកាន់រដ្ឋាភិបាលនៃគណបក្សឆ្វេងនិយមកណ្ដាល គឺគណបក្ស​ការងារ​របស់នាយករដ្ឋមន្ត្រី លោក Anthony Albanese ថា បានជួយ​ជំរុញ​ឲ្យ​មាន​ឧក្រិដ្ឋ​កម្ម​បែប​នេះ ដូចជាការវាយប្រហារកាលពីថ្ងៃទី៦ ខែធ្នូ លើវិហារជ្វីហ្វ Adass Israel តាមរយៈ​គោល​នយោបាយ ដែលមានរួមទាំងការគាំទ្រញត្តិរបស់អង្គការសហប្រជាជាតិ (UN) នាពេលថ្មីៗនេះ ដែល​គាំទ្រ​រដ្ឋប៉ាឡេស្ទីន។

លោក Netanyahu បានបង្ហោះនៅលើបណ្ដាញសង្គម X ថា៖ «ជាសំណាងមិនល្អ អំពើ​ឧក្រិដ្ឋ​កម្ម​នេះ មិនអាចបំបែកចេញបានឡើយពីស្មារតីប្រឆាំងអ៊ីស្រាអែល ដែលកំពុង​រាល​ដាល​ចេញ​ពី​រដ្ឋាភិបាល​របស់​គណបក្សការងារក្នុងប្រទេសអូស្ត្រាលី»។

ជាការឆ្លើយតប រដ្ឋមន្ត្រីអូស្ត្រាលីទទួលបន្ទុកការងារ និងទំនាក់ទំនងនៅកន្លែងធ្វើការ លោក Murray Watt បាននិយាយថា៖ «រដ្ឋាភិបាលរបស់លោក Albanese បានចាត់​វិធាន​ការ​ខ្លាំង​ក្លា​ជា​ច្រើន ដើម្បីរារាំងពួកប្រឆាំងជនជាតិជ្វីហ្វនិយម ហើយនិងដើម្បី​លុប​បំបាត់​ទង្វើ​បែប​នេះ​ចេញ​ពី​សហគមន៍​របស់យើង»។ លោក Watt បានបន្ថែមថា៖ «ដោយក្ដីគោរព ខ្ញុំមិនយល់​ស្រប​ជា​មួយ​នាយករដ្ឋម​ន្រ្តី លោក Netanyahu ពាក់ព័ន្ធនឹងបញ្ហានេះ»។

គួរបញ្ជាក់ថា លោក Albanese បានថ្កោលទោសការវាយប្រហារកាលពីថ្ងៃទី៦ ខែធ្នូ ដោយ​និយាយ​ថា មិនមានទីកន្លែងទុកសម្រាប់ពួកប្រឆាំងនឹងជនជាតិជីហ្វនិយមនោះទេ នៅ​ក្នុង​ប្រទេស​អូស្ត្រាលី។

នគរបាល បាននិយាយនៅថ្ងៃទី៧ ខែធ្នូនេះថា ពួកគេនៅតែកំពុងស្វែងរកមនុស្ស ២នាក់​ដែល​សង្ស័យ​ថា​មានចេតនាបង្កឲ្យមានអគ្គិភ័យ នៅវិហារជ្វីហ្វ ដែលហេតុការណ៍​នោះ​បាន​ធ្វើ​ឲ្យ​មនុស្ស​ម្នាក់​រង​របួស និងបណ្តាលឲ្យមានការខូចខាតយ៉ាងធ្ងន់ធ្ងរ នៅក្នុងទីក្រុង Melbourne ដែលរ​ដ្ឋ​ធានី​របស់រដ្ឋ Victoria៕