មនុស្សរាប់ម៉ឺននាក់ នៅទូទាំងចក្រភពអង់គ្លេស ត្រូវគ្មានអគ្គិសនីប្រើប្រាស់ កាលព្រឹកថ្ងៃសៅរ៍ (ទី៧ ខែធ្នូ) បន្ទាប់ពីព្យុះ Darragh បានបក់បោកលើប្រទេសនេះ ជាមួយនឹងល្បឿនខ្យល់បក់ដ៏ខ្លាំង ហើយបណ្តាលឲ្យមានការរំខានដល់ការធ្វើដំណើរ នៅមុនបុណ្យណូអែល។

ការិយាល័យឧតុនិយម (Met Office) របស់ចក្រភពអង់គ្លេស បានចេញសេចក្ដីប្រកាសអាសន្នពណ៌ក្រហមដ៏កម្រកើតមាន សម្រាប់ខ្យល់បក់ខ្លាំងពេញមួយយប់ រហូតដល់ព្រឹកថ្ងៃទី៧ ខែធ្នូ ដែលគ្របដណ្តប់ផ្នែកខ្លះនៃប្រទេសវ៉េលស៍ និងភាគនិរតីនៃប្រទេសអង់គ្លេស។ រដ្ឋាភិបាលបានព្រមានប្រជាជន ៣លាននាក់ដែលរស់នៅក្នុងតំបន់នេះ ដោយការជូនដំណឹងដូចសំឡេងស៊ីរ៉ែន លើទូរសព្ទរបស់ពួកគេ ឲ្យនៅតែក្នុងផ្ទះសម្បែងរបស់ខ្លួន កាលពីយប់ថ្ងៃទី៦ ខែធ្នូ។

គួរបញ្ជាក់ ព្យុះ Darragh ដែលជាព្យុះទី៤ នៃរដូវកាលនេះ ក៏ត្រូវបានគេរំពឹងដែរថា នឹងនាំឲ្យមានភ្លៀងធ្លាក់ខ្លាំង នៅចុងសប្តាហ៍ ដោយមានការព្រមាន និងការជូនដំណឹង អំពីទឹកជំនន់ច្រើនជាង ១០០ដង នៅទូទាំងចក្រភពអង់គ្លេស។

បើយោងតាមទីភ្នាក់ងារសារព័ត៌មាន PA បានឲ្យដឹងថា នៅប្រទេសវេលស៍ ការិយាល័យឧតុនិយម បានប៉ាន់ប្រមាណថា កម្លាំងខ្យល់បក់ គឺរហូតដល់ ១៥០គីឡូម៉ែត្រ ក្នុងមួយម៉ោង ដែលបានធ្វើឲ្យមនុស្សជាង ៥០.០០០នាក់មិនមានអគ្គិសនីប្រើប្រាស់។ ហើយបើយោងតាមសមាគមបណ្តាញថាមពល បានប្រាប់ឲ្យដឹងថា ការដាច់ចរន្តអគ្គិសនីនេះ បានប៉ះពាល់ដល់ផ្ទះសមម្បែងចំនួន ៨៦.០០០ខ្នង នៅក្នុងប្រទេសអង់គ្លេស ស្កុតឡែន និងវេលស៍។

ជាមួយគ្នានេះ រថភ្លើងត្រូវបានរំខាន ឬផ្អាក នៅលើផ្លូវជាច្រើនខ្សែ ក្នុងនោះរួមទាំងពីផ្លូវពីទីក្រុង Glasgow ទៅទីក្រុង Edinburgh ក្នុងប្រទេសស្កុតឡែន និងរវាងអាកាសយានដ្ឋាន Cambridge និង Stansted នៅភាគខាងកើតនៃប្រទេសអង់គ្លេស។ ប្រតិបត្តិករផ្លូវដែក CrossCountry បានចេញការជូនដំណឹង «កុំធ្វើដំណើរ» សម្រាប់ថ្ងៃទី៧ ខែធ្នូ ដោយសារការលុបចោល និងការពន្យារពេលជាច្រើនខ្សែ៕